Umqhudelwano womphebezo eThekwini
Kusukela ngoLwesibili olwedlule kwaze kwaba iSonto, eThekwini bekunomqhudelwano womphebezo obizwa ngeWorld Contender Series nobubanjelwe e-Olive Convention Centre (OCC).
Inhloso yalo mqhudelwano obuhlelwe iSouth Africa Table Tennis Board (SATTB) ngokubambisana neWorld Table Tennis (WTT), bekuwukuhlunga abadlali abazokuba yingxenye ye-International Table Tennis Federation (ITTF) World Championship, ezoqala mhla zingama-20 isongwe mhla zingama-28 kuNhlaba e-International Convention Centre (ICC), eThekwini. Okugqamile ukuthi kule midlalo bekudlala osondo nzima abahlonishwayo emhlabeni kuwona lo mdlalo.
ElaboHlanga libe seliba nengxoxo ekhethekile nomdlali okeliswe kunombolo-1 kuPara Table Tennis lapha eNingizimu Africa kulo mdlalo uSthabile Mnyandu. Lo mdlali ubekhuluma ngakufundile, njengoba ubebukela abadlali abahloniphayo kulo mdlalo. “Ngifunde okukhulu. Engikubonile ukuthi isayinde indlela okumele ihanjwe abadlali balapha eNingizimu Afrika, amazinga awafani nhlobo. Okunye ukuthi laba badlali bakulamazwe abeyingxenye yalo mqhudelwano ngeledlule ukuthi bathatha lo mdlalo njengomdlalo owumsebenzi kubona obaphilisayo, futhi banabaqeqeshi abasezingeni eliphezulu kakhulu.
Okuningi kuyafana nokwethu ukuthi izinga lithe ukunyuka kubona. Konke engikubonile ngizobuyela emumva ngiyosebenzela kukhona ngibone ukuthi ngiphelelaphi” kusho uSthabile. Kulo mqhudelwano weWorld Contender Series, kuwona kukhonye iChina enqobe kowamanqamu eminxeni emine.
Ibuzwa le ntokazi ukuthi ngabe iNingizimu Afrika ikulungele yini ukusingatha umqhudelwano ozoba ngoNhlaba uthe: “Indlela engibone ngayo angikuboni okungavimba iNingizimu Afrika ekutheni isingathe lo mqhudelwano. Konke bekuhlelekile, ngingazike ngokwenzeka ngemumva kodwa okade kusemehlweni ethu ayi izinga beliphezulu kakhulu” isho kanje.
Ibuzwa ngokuthi izizwa injani ukuthi iTheku yilo elizosingatha umqhudelwano ozobe ubhekwe uMhlaba wonke. “Inqayizivele yethuba leli kubadlali balapha eNingizimu Afrika. Kuyinto enkulu kakhulu ukuthi uzobe ulapha kwelikabhanana, ngiyajabula kakhulu ngizoncela ulwazi olukhulu ngizobe ngibhekene nezingonyama ekhaya lami lapho engidabuka khona. Lokhu kuveza ukuthi iTheku alilincanyana. Angingabazi ukuthi lo mqhudelwano lizowusingatha ngokweqophelo eliphezulu, nasemnyakeni ezayo miningi imiqhudelwano esazosingathwa iTheku” kusho uSthabile.