Ibe impumelelo eyeTable Tennis eThekwini
Kukhonye iChina emidlalweni yokuhlunga abazokuba yingxenye ye-International Table Tennis Federation (ITTF) World Championship, ezoqala mhla zingama-20 isongwe mhla zingama-28 kuNhlaba e-International Convention Centre (ICC), eThekwini.
Ngaphambi kokuqala kweWorld Championship, iSouth Africa Table Tennins Board (SATTB) ngokubambisana neWorld Table Tennis (WTT), bahlele imidlalo yeWorld Contender Series ebiqale ngoLwesibili edlule kwaze kwaba izolo ngeSonto e-Olive Convention Centre (OCC) eThekwini.
IWorld Contender Series umqhudelwano odlalwa abadlali abahlonishwayo emhlabeni.
Kwabesifazane kwabahamba ngabodwa kunqobe u-Qiani Tianyi wehlule uFan Siqi (4-1). Kwabesilisa kwabahamba ngabodwa uHugo Colderano waseBrazil nokeliswe kunombolo-7 emhlabeni wahlula uYaroslav Zhmundeko (4-0).
Kwi-Double kwabesifazane uZhang Rui noKuai Man bahlule uQian noShi Xunyao (3-1), kwabesilisa uChrn Yuanyu noLin Shidong behlula uXu Yingbin noXu Haidong (3-1).
Kwabaxubile uLin noKuai behlule uXue noQian (3-1).
UMengameli we-ITTF uPetra Sorling, uncome izinga lalo mqhudelwano.
“U-2023 usufikile amehlo abheke eThekwini, kowe-World Championship. Lokho kusho lukhulu ukuthi izee lase-Africa lisingathe lo mqhudelwano omkhulu kangaka. Ukwenza iWorld Contender besifuna ukubuka ukuthi ngabe lelizwe likulungele yini ukusingatha oweWorld Championship ngoNhlaba” kusho uSorling.
Kungokokuqala ukuthi umcimbi we-ITTF ongomkhulu kangaka ubanjelwe eNingizimu Afrika. Ugcina ukuba lapha ezwenikazi i-Africa wabe use-Cairo, e-Egypt, ngowe-1939.
