Ungubani uMnu uCyril Ramaphosa?
Ukunyamalala kwakhe isikhashana kwezepolitiki wangena shi emabhizinisini akuzange kuwucime umlando namagalelo aziwa ngawo ekubeni ungqondongqondo ekubhalweni koMthethosisekelo wakuleli ohlonishwa umhlaba wonke.
UMnu uCyril Matamela Ramaphosa wazalwa zili-17 kuLwezi ngowe-1952 eSoweto. Waqala ukuzihlanganisa nepolitiki yakuleli esemncane eNyuvesi yase-North esiyaziwe ngeNyuvesi yaseLimpopo. Ubuhlakani abukhombisa baholela ekutheni ajutshwe ekusunguleni inyunyana yabasebenzi basezimayini iNational Union of Mine Workers (NUM).
Waphumelela ekukhuliseni iNum ngesikhathi esifushane yagcina isinamalungu afinyelela kuma-300 000. Wazifaka ezinhliziyweni zabasebenzi iNum inqoba amacala amaningi, iphambili nasekulweleni amaholo abasebenzi basezimayini. Engqungqutheleni yokuqala ye-ANC emuva kokuvulwa umlomo ngowe 1991, waqokwa kwesokuba uNobhala Jikelele.
Isithombe sakhe evika ulaka lwamasosha komkhuzi wezempi eCiskei uBrigadier Oupa Gqoza emashini eyayilwisana nombuso wakhe namanje sisaxoxa indaba. Emuva kokhetho lwangowezi 2014, uMnu uJacob Zuma wamqoka njengeSekela lakhe kuhulumeni. Ngaphansi kukaZuma nguye obengumholi Wamabhizinisi KaHulumeni ebhekele no Eskom. Engqungqutheleni yowezi-2017 uqokwe njengoMengameli we-ANC.
Ngesikhathi kuxoshwa uZuma ngoNhlolanja wezi-2018 nguye othathe izintambo njengoMengameli. Izethembiso azenza ethatha zaholela ekutheni abantu babeke kuyena wonke amathemba
