Mningi umlando oqoshwe iQatar iwashiswa ijezi
Naphezu kokuba kuseyisigaba sokuqala semidlalo yeNdebe YoMhlaba kubonakala uzoba mningi umlando ozoqopheka kule midlalo.
Ngaphandle kokuba izwe lokuqala lama-Arabhu eMiddle East emlandweni ukusingatha le midlalo, iQatar ingene komunye umlando wokuba yizwe lokuqala emlandweni wemidlalo yeNdebe YoMhlaba ukukhishwa ngaphandle kokuthola iphuzu ekubeni kuyilo elingosokhaya.
Kuze kube yimanje yilona futhi izwe eliphethe isicoco sokubhacaza ukuwedlula wonke kulo mqhudelwano. Iphinde yangena komunye umlando ngokwephula irekhodi leNingizimu Afrika ngokuba izwe elingosokhaya eliwashiswa ijezi esigabeni sokuqala semidlalo.
Lo mlando waqoshwa iBafana Bafana ngowezi-2010. Bekuqala ukuthi iQatar incintisane ezingeni lomhlaba kwezemidlalo, futhi nakuba ithole lenqabakutholwa yingoba yiyo esingethe imidlalo. Iningi labadlali ligijima kuligi yangaphakathi ezweni.
Ilinganiselwa ezigidigidini ezingama-$220 imali esetshenzisiwe ukulungiselela le midlalo evule ngobukhazikhazi, kodwa konke lokho angeke kwalithenga ikhono nethalente.
NgoLwesihlanu olwedlule iQatar isuthiswe induku iSenegal ngamagoli amathathu kwelilodwa kwaphela konke ngayo.
Noma kuyiwe emdlalweni wayo wesithathu neNetherland ngoLwesibili sekucacile ukuthi isiphumile, iNetherlands ibuye yashayelela isipikili ngamagoli amabili ashaywe uGakpo noFrenkie de Jong.
Lo mphumela usho ukuthi ezikaLouis van Gaal ziqede phezulu kuGroup A zinamaphuzu ayi-7 zilandelwa iSenegal eshaye I-Ecuador ngamabili kwelilodwa. INertherlands kolandelayo izodlala noqede phezulu kuGroup B.
INertherlands yayingabonwa eRussia ngemidlalo yeNdebe YoMhlaba ngowezi-2018 lapho yahluleka yancama ukuzibekisela indawo.
