Amavukelambuso eDRC abeke imibandela ngezingxoxo

Iqembu lamavukelambuso eDemocratic Republic of Congo i-M23 ngoLwesihlanu lithe lifuna ukukhuluma ngqo nohulumeni ngemuva kokuthi umengameli waseCongo kanye nabanye abaholi base-Afrika besayine isivumelwano sokumisa udlame okuhloswe ngaso ukumisa ukuhlasela kwamasosha.

Abaholi baseCongo, Rwanda, Burundi kanye ne-Angola bahlangane ngesonto eledlule eLuanda ukuthola isixazululo kudweshu olusempumalanga yeCongo, oseluphoqe izinkulungwane ukuba zishiye amakhaya azo.

Basayine isivumelwano sokuthi bazoqinisekisa ukuthi kumiswe ukulwa kusukela ngoLwesihlanu, bathi amasosha esifunda azongenelela empini ne-M23 uma ingahoxisi amabutho ayo.

Nokho i-M23 ibingeyona ingxenye yezingxoxo futhi ithole ngalesi sitatimende ezinkundleni zokuxhumana, kusho umkhulumeli wayo.

“Sibonga abaholi besifunda ngemizamo yabo yokuthola isixazululo esinokuthula kule ngxabano ekhona,” kusho okhulumela iM23 uLawrence Kanyuka.

“Sinikeze izingxoxo eziqondile nohulumeni ukuze kuxazululwe izimbangela zokungqubuzana ezidala zonke lezi zimpi lapha,” mholi we-M23 uBertrand Bisimwa naye ukhiphe isitatimende esifanayo.

Uhulumeni waseCongo ukuchithile ukuxoxisana ne-M23, oyichaza njengeqembu lamaphekula.

Ebuzwa ngalokhu esithangamini nabezindaba ngoLwesine, ungqongqoshe wezangaphandle uChristophe Lutundula uthe: “Ngeke kwenzeke. Ngingakuqinisekisa egameni likahulumeni kanye noMongameli weZwe.”

I-M23 ithe isivele yakumemezele ukuthi kuzomiswa ukudubulana ngoMbasa  futhi ngamasosha aseCongo aqala ukuhlasela. Kodwa-ke, ukulwa kuqhubekile kusukela ngaleso sikhathi, futhi i-M23 ibambe amadolobha amaningana empumalanga yeCongo.

Ngesikhathi lisungulwa ngowezi-2012, leli qembu kwaba ngelakamuva ochungechungeni lwezihlubuki eziholwa ngamaTutsi ukuvukela amabutho aseCongo.

Yaxoshwa eCongo ngo-2013 ngemuva kokuthatha indawo enkulu, kodwa ibe nokuqala kabusha okukhulu kulo nyaka. Ongoti baseCongo kanye ne-UN bathi leli qembu lisekelwa yiRwanda, okuyinto iRwanda ephikayo.