Bamangazwe ukuhoxa isigubhukane kwezikaMashaba
IFreedom Front Plus (FF Plus) ithi isinqumo se-ActionSA sokuhoxa kumfelandawonye oholwa yi-DA eKurhuleni siyisimanga.
I-ActionSA ithi ukuhoxa kwayo kulandela ukukhathazeka ngokungasimami kukahulumeni wedlanzana. Ilungu lePhalamende le-FF Plus, uCorné Mulder, uthi i-ActionSA ayizange ibazise ozakwabo bomfelandawonye ngenhloso yabo yokuhoxa.
“Kwangimangaza. Ngicabanga ukuthi bengingakulindele lokho. Ngokwezinhlinzeko zesivumelwano somfelandawonye, isigaba sesi-8, kufanele bazise amanye amadlelandawonye ngezinhloso zabo abangazenzanga. I-ActionSA inqume ukungasazisi, angazi ukuthi kungani. Babambe isithangami sabezindaba ukumemezela lokho. Ngakho, bekuyisimangaliso, yebo impela.”
I-ActionSA eDolobheni lase-Ekurhuleni ithi nakuba imeseka uhulumeni wobumbano kodwa ngeke ithathe isikhundla seMayoral Committee emkhandlwini. Leli qembu belisize okhethweni iMeya yeDA uTania Campbell.
Kodwa ekhuluma nabezindaba eGoli namhlanje ekuseni, uSihlalo we-ActionSA uMichael Beaumont uthi isinqumo sabo sokushiya isigungu esiphezulu sithonywe ukuthi cishe ama-60% wezakhamuzi uthi izinto bezingahambi ngendlela kulezi zinyanga ezili-12 ezedlule.
Uthi ziningi izivumelwano zamadlelandawonye azizange zenziwe. Nokho, uBeaumont uthi bathathe isinqumo sokuba iqembu eliphikisayo elakhayo emkhandlwini.
