Ubona iNew Zealand izobuya ngeshodi
Umqeqeshi wamaBhokobhoko uJacques Nienaber uthi ulindele ukuthi iNew Zealand ibuye ngamandla emdlalweni wakusasa. Usho lokho nje iNew Zealand iyatshutshumbelwa, kwazise iguqiswe iwona amaBhokobhoko ngamaphuzu angama-26 kwali-10 eMbombela.
La maqembu azotholana emdlalweni wesibili weRugby Championship. Okugqamile ngalo mdlalo ukuthi uNienaber, wenze izinguquko ezinhlanu eqenjini lakhe elizoqala umdlalo. La mazwe ahlonishwayo kumbhoxo emhlabeni azotholana phezulu libumbene elesi-5 ntambama, e-Ellis Park, eGoli. Lo mqeqeshi ushintshe abadlali ababili emuva, uJaden Hendrikse uzothatha indawo ka-Faf de Klerk kwiscrumhalf, kulandela ukushayeka kwakhe ekhanda emdlalweni owedlule.
UJesse Kriel uzoqala ophikweni lwesokudla endaweni kaKurt-Lee Arendse, okhululiwe eqenjini ngemuva kokumiswa amasonto amane. U-Arendse uthole ikhadi elibomvu emdlalweni odlule ngenxa yokudlalisa kabi umdlali waseNew Zealand. Phambili uDuane Vermeulen uzovala isikhala sikaJasper Wiese, uBongi Mbonambi aqale esikhaleni sikaMalcolm Marx kwihooker, kuthi u-Ox Nche athathe indawo kaTrevor Nyakane kwiprop.
“Senze izinguquko ezimbalwa eqenjini kodwa uDuane, uJesse noHerschel bonke bangabadlali abanamava abazazi kahle izinhlelo zethu futhi abayizethenjwa kumaBok. U-Ox uphinde wakhombisa ukuthi uyakwazi ukufaka umfutho phambili, ngakho-ke usebuyile” kusho lo mqeqeshi.
UNienaber ufanise iNew Zealand namaBhokobhoko ngokuthi ayidikibali nhlobo.
“Ama-All Blacks (iNew Zealand) alwe kwaze kwaba sekugcineni eMbombela Stadium, ngesonto eledlule nakule mpelasonto silindele okufanayo. Banabadlali abaseqophelweni eliphezulu futhi uma kubhekwa umlando phakathi kwala maqembu. Silindele omunye umdlalo onzima. Balangazelele ukubuya ngemva kwemiphumela embalwa engemihle, siyazi ukuthi sizobhekana nenselelo enkulu kule mpelasonto. Sigxile ekuthuthukiseni umdlalo wethu nokuqinisekisa ukuthi siqhubeka nomgqigqo wangesonto eledlule. Siwubhekisisile umdlalo sabona okuningi okuhle esikwenzile kodwa kunezindawo okudingeka sithuthuke kuzona. Kubalulekile ukuthi silungise lokho ngaphambi kokuthi siye e-Australia nase-Argentina.”
Kunaba uNienaber. Emva kwalomdlalo wakusasa amaBhokobhoko azovakashela i-Australia emdlalweni ozoba mhla zingama-27 kwephezulu. Iqembu lamaBhokobhoko elizobhekana neNew Zealand:
Abazoqala: 15 Damian Willemse, 14 Jesse Kriel, 13 Lukhanyo Am, 12 Damian de Allende, 11 Makazole Mapimpi, 10 Handre Pollard, 9 Jaden Hendrikse , 8 Duane Vermeulen, 7 Pieter-Steph du Toit, 6 Siyamthanda Kolisi (kaputeni), 5 Lodewyk de Jager, 4 Eben Etzebeth, 3 Frans Malherbe, 2 Mbongeni Mbonambi, 1 Retshegofaditswe Nche.
Ebhentshini: 16 Malcolm Marx , 17 Steven Kitshoff, 18 Vincent Koch, 19 Franco Mostert, 20 Albertus Smith, 21 Hershel Jantjies, 23 Willie le Roux