Yazi amagama ezinkanyezi ngesiZulu
Enye yezinto eziwubufakazi bokuthi aboHlanga babenobuhlakani babo ngamagama angumsinsi ababiza nabaqamba ngayo izinto. La magama asuke engaveli esingisini noma kolunye ulimi okungelona olwase-Afrika. Amanye amagama angumsinsi yilawo okubizwa ngawo izinkanyezi.
AboHlanga bakwaXhosa bathi yiinkwenkwezi, aboHlanga abangamaShona le eZimbabwe bathi yinyenyedzi. AbeSotho bona banelabo elithi yidinaledi kuthi amaTsonga wona athi yitinyeleti , kube yimaledzi kuBaVenda , ilinaleri kubeTswana, nenyota ngesiSwahili. KubeNguni bakwaZulu zikhona izinhlobo zezinkanyezi kanti nazo zinamagama.
Ikhwezi: Le nkanyezi inkulu, ikhanya ngokugqamile. Iphuma entathakusa, ilandelana nendonsa.
Indonsa (Indosa): Le nkanyezi iphuma kuqala, ihole ezinye ngokushesha. Iphuma entathakusa khona kuze kuse.
Indonsakusa: Kuseyiyona indonsa.
Inqonqoyi (Inqongolozi): Nayo indonsa
Indonsamasuku: Inkulu, ibomvu, iphuma ebusuku sekulele wonke umuntu, sekuqala ukucathama abathakathi.
Inkwenkwezi: Inkanyezi ekhanye bha eyaye ivele ekuseni ngezikhathi zikaNtulikazi.
Intshola: Inkanyezi evela ekuseni kakhulu ngezikhathi zoMandulo. Iphuma ngesikhathi okuthiwa ngesokuqhuba izinkomo zokwebiwa. Yingakho kuthiwa iqhubankomo.
Iqhubankomo: Abanye bayibiza kanjalo intshola.
Isandulela: Inkanyezi ekhanya kakhulu evela ngokuphela kwentwasabusika
Isicelankobe: Inkanyezi evela ilandela ukushona kwelanga, sengathi ibisithi liyoshona nini. Icela izinkobe phela zisuke zisazobekwa eziko.
Umthala: Lezi zinkanyezi ziba ziningi zenze isixhobo. Zanda ehlobo. Ungalala zibheke endaweni ethile ebusuku, kuyabase sezibheke engxenye.
Ondweliyana (Ondwendweni): Uhwezane lwezinkanyezi olukhanya sakufikiza.
Insansa: Uhlobo lwezinkanyezi olukhanya kakhulu.
Isilimela: Lezi zinkanyezi ziphuma zibe yisixuku noma isixhobo ngasenyakatho, zibe luthohto. Isilimela siphuma Phakathi kobusuku.
Isindwengama: Ulwezane lwezinkanyezi oluvela ngezikhathi ezithize.
Isiphambano saseNingizimu: Ziluhoyi, zenza umfanekiso wesiphambano obheke eNingizimu
Olunye ulwazi luthathwe ebhukwini iNgqolobane kaZulu
