Uzibekele umlando uSalima kowe-Afcon

Iqophe umlando intokazi yaseRwanda, iba ngunompempe wokuqala ukudlalisa kumqhudelwano omkhulu e-Africa i-African Cup of Nations (AFCON) esingethwe iCameroon.

Le ntokazi nguSalima Mukansanga oneminyaka yobudala engama-34.

USalima udlalise umdlalo wokugcina kuqoqo B nobuphakathi kweZimbabwe neGuinea. Lo mdlalo ugcine unqontshwe iWarriors (iZimbabwe) ngamagoli amabili kwelilodwa.

Uwudlalise ngokukhulu  ukucophelela njengoba lingekho iphutha alenzile nelishiye imibuzo. 

Kulo mdlalo obubanjelwe e-Ahmadou Ahidjo Stadium, ukhiphe amakhadi aphuzu amahlanu. Unikeze uNaby Keita, uMamadou Kane no-Ibrahima Cisse beGuinea, wabe esenikeza uTalbert Shumba noKudakwashe Mahachi beWarriors.

Bekuwumdlalo wesibili lo ebonakala enkundleni, owokuqala wabe engumsizi kanompempe. Kulowo mdlalo kwakutholene phezulu iGuniea neMalawi.

Umlando wale ntokazi uveza ukuthi unobhutshuzwayo umdlalo engakaze iwucabange ikhula njengoba esikoleni yabe izidlalela ibhola lomnqakiswano. Yagcina iwushiya phansi lo mdlalo njengoba izinsiza zokuziqeqesha zabe zingekho.

Kuthe isifunda eST Vincent de Paul Masanze Secondary School, yaqala yaba ngunompempe kunobhutshuzwayo. Kusukela lapho ayibange isabheka emumva.

Ineziqu zokuba nguMhlengikazi eyazithola e-University of Gitwe.

Abanye onompempe besifazane abakhona kulo mqhudelwano, uCarine Atemzabong waseCameroon, uFatima Jermoumi noBouchra Karboubi baseMorocco.

USalima ngonyaka wezi-2019 ungomunye wonompempe ababedlalisa umqhudelwano weNdebe YoMhlaba eyabe iseFrance. Akagcinanga lapho useke wadlalisa kuma-Olympics kanye nakumqhudelwano iCAF Women’s Champions League.

U-Eddy Maillet oyinhloko yonompempe ngaphansi kweCAF uyilalaliselile le ntokazi.

“Kumfanele uSalima ukuba aqophe lo mlando, udlule ezintweni ezinzima ukuze afike lapho akhona njengamanje. Ukusebenza kwakhe kanzima ikhona okumbeke lapho akhona”  kusho uMalliet.

Uthe lokhu kukhuthaza intsha yesifazane e-Africa enemtshisekelo ekubeni ngunompempe kunobhutshuzwayo ukuthi nayo ingazibona