URhulani usephakamise elikaJali kowomdlali ovelele
Akawuvali umlomo ngefomi ka-Andile “Gattuso” Jali osanda kuqokwa njengomdlali ovelele kuDSTV Premiership.
UJali oyibamba enkabeni yenkundla kuma-Brazillians uqokwe njengomdlali ovelele enyangeni kaZibandlela kwathi uManqoba Mngqithi noRhulani Mokwena bahlomula ngomklomelo wabaqeqeshi abavelele.
UNkosingiphile Ngcobo weKaizer Chiefs ukhale wemuka nowegoli elivelele. Ushaye ingcwenga yegoli bebhekene neSekhukhune United.
UMokwena usedalule ukuthi uJali kumfanele ukubalwa nabadlali abasethubeni lokuqokwa njengomdlali ovelele kuDSTV Premiership uma sekuphela isizini.
“Siyambongela u-AJ ngokunqoba umklomelo womdlali ovelele. Lo mklomelo umfanele. Ngikholwa wukuthi kumele simshayele izandla ngomgqigqo wakhe omuhle. Ukugcina umgqigqo ofanayo akuyona into elula. Kudinga uqine nangokomqondo. Uma wenza kahle wonke amehlo ahlala kuwena okusho ukuthi kumele ubambe umgqigqo ofanayo ukuze uhlale useqenjini,” kusho uMokwena.
UJali useqale imidlalo eli-16 yeligi kule sizini. Usakhe amagoli amabili wavalela enethini elilodwa.
“Njengamanje u-AJ uyazitamuzela ngamamaki kuyo yonke imidlalo ayidlalayo. Umdlalo nomdlalo uthola amamaki ayisishiyagalombili. Akulula ukuzuza lokhu. Kumele anconywe ngendlela azinikela ngayo. Ithimba lodokotela nalo kumele lishayelwe izandla ngomsebenzi omuhle eliwenzayo ukugcina abadlali beyimiqemane. Okumqoka wukuthi singayeki ukuzimisele. Uma siqhubeka nokusebenza ngale ndlela esiyibambe ngayo manje angingabazi ukuthi izinkulumo ngomdlali ovelele sizoqala kwabezindaba. Kuyangethusa ukuthi azikaqali. Kumele ngabe isiqalile imibuzo ngokuthi u-AJ noMshishi (Themba Zwane) kubafanele yini ukuqokwa njengabadlali abavelele,” kubeka uMokwena.
ISundowns ivule igebe lamaphuzu angu-14 esicongweni seDSTV Premiership.
“Ngiyethemba ukuthi njengoba u-AJ eseqokwe njengomdlali ovelele igama lakhe lizophakanyiswa kubadlali abafanelwe ngumdlali ovelele. Useqokwe njengomdlali ovelele emidlalweni yethu eminingi kule sizini ukufakazela umgqigqo wakhe. Sekuyisikhathi sokuthi siqale leyo nkulumo. Ngizokwethuka impela uma kuqhubeka kucweba iziziba.” kuchaza uMokwena.
