Aseqhathiwe azobhekana koweNedbank Cup
Aseqhathiwe amaqembu azotholana phezulu kumqhudelwano womkhumulajezi iNedbank Cup.
Lo mqhudelwano odlalwa ngamaqembu angama-32, ungothokozelwa abaningi kwazise udlalwa ngisho amaqembu adlala esigabeni esiphansi nokunika ithuba abadlali abangaziwa ukuba bazibonakalise. U-Andile Jali olibamba kuthule umoya esiswini seMamelodi Sundowns ungomuye wabadlali abagqama kakhulu kulo mqhudelwano.
Amaqembu ayibamba kulo mqhudelwano ali-16 adlala kwi-Dstv Premiership, wakwiGladAfrica Championship, naqhamuka kwi-ABC Motsepe League.
Okunye okugqame ngalo mqhudelwano ukuthi amaqembu amancane anikeza amakhulu inkinga, izinkuzi zaseSoweto iKaizer Chiefs ne-Orlando Pirates ziseke zabhekana nalowo mshophi.
Okugqamile ngalokhu kuqhathwa kwamaqembu ukutholana phezulu kweKazier Chiefs neTS Galaxy. Kuzokhumbuleka ukuthi ukugcina ukutholana phezulu kwala maqembu kwabe kungumdlalo wamanqamu, nowashiya izigidi zabalandeli beChiefs bekhala kwazise iTS Galaxy kaTim Sukazi iyona eyanqoba lowo mdlalo. Lo mdlalo wabe ungonyaka wezi-2019, eMoses Mabhida Stadium.
Ukutholana kwalamaqembu akubuzwa kuyinto engangatshazwa ukuthi kuzovuka iminjunju kwiziMpofana. UZakhele Lepasa uyena owaba yiqhawe kulo mdlalo kwazise bamushaya ebhokisini wavuka wazibambela mathupha iphenathi wayivalela Phakathi nalapho umdlalo wawusuphela.
Omunye umdlalo obukeka uzoshuba ohlangani iRoyal AM neCape Town City. Umqeqeshi weCape Town City u-Eric Tinkler uthe lo mdlalo akangabazi ukuthi uzoshuba kakhulu.
“Ukuze uwine umqhudelwano womkhumulajezi kumele uyinqobe yonke imidlalo, lokho kusho ukuthi njengoba uma sifuna ukunqoba iNedbank Cup kumele sazi ukuthi siyanqoba. Siyihlulile iRoyal AM kuligi siyihlulela enkundleni yayo, nakhu manje siyotholana nayo futhi ekhaya layo ngibona kuzoba nzima kulokhu ngoba ngeke ivume ukuthi siyiphinde” kusho uTinkler.
Omunye umdlalo ongase ushukumise abaningi ophakathi kwePirates, ezodlalela ekhaya, na-AmaZulu FC. Kuzokhumbuleka ukuthi la maqembu agcine ukuhlangana ngoZibandlela nyakenye nalapho kwanqoba khona eZimnyama ngamabili kwelilodwa.
Amanye amaqembu agijima kuDStv Premiership azotholana phezulu, iMaritzburg United ezodlala neSupersport United kube iStellenbosch neBaroka FC.
Izinsuku nezinkundla okuzodlalelwa kuzona kuzomenyezelwa khona maduze nje yiPremier Soccer League (PSL).
Aqhathwe kanje esewonke kwiNedbank Cup Last 32:
iNC Professionals FC v Mathaithai FC, iRoyal AM v Cape Town City, iVenda Football Academy v African All Stars FC, iMaritzburg United v SuperSport United, i-University of Pretoria v Chippa United, iPlatinum City Rovers v Sekhukhune United, iStellenbosch FC v Baroka FC, iSwallows FC v TS Sporting FC, iTshakhuma FC v Lamontville Golden Arrows, iKaizer Chiefs v TS Galaxy, iSinenkani FC v Free State Stars, iMarumo Gallants v Santos FC, i-Orlando Pirates v AmaZulu FC, Uthongathi FC v Summerfield Dynamos FC, iBlack Eagles FCv Sivutsa FC