AmaProteas alengela engozini yokulahlekelwa ngumlando omuhle
Alengela engozini yokushaywa elaseNdiya okokuqala eNingizimu Afrika emidlalweni yama-Test, amaProteas avale usuku lwesibili edonsa ngodilizi.
Elakuleli liqale usuku lwesibili lisethubeni elihle lokufaka ingcindezi eqenjini lesizwe laseNdiya emdlalweni wesithathu we-Test phakathi kwamaProteas nelaseNdiya, eNewlands, eKapa.
AmaProteas enze ezibukwayo osukwini lokuqala ekhipha elaseNdiya selenze ama-run ama-223 kuma-over angama-78.
Aqede usuku lokuqala esalahlekelwe yiwikhethi eyodwa kanti asebeshaye ama-run ali-17. Abesakweleta iqembu lesizwe laseNdiya amanye ama-run ama-206.
Ithemba belilikhulu ukuthi amaProteas azoqeda i-Innings yawo yokuqala esehamba phambili kodwa alahlekelwa amawikhethi ubuthaphuthaphu.
Aphume wonke esenze ama-run ama-210. UKeagan Petersen udlale ikhilikithi enenkosi phakathi eshaya ama-run angama-72 emabholeni ali-166.
Ugcine ekhishwe nguJasprit Brumah nge-over ka-67. Lo mdlali okhombisa izimpawu ezinhle akazange akuthole ukwesekwa okufanele kozakwabo.
UBumrah nguyena owenze izinto zenzeka. Uthathe amawikhethi amahlanu kuma-over angama-24 kwathi uMohammed Shami noYadav Umesh bahlomula ngamawikhethi amabili umshwibi ngamunye. Enye iwikhethi ithathwe nguShardul Thakhur.
ElaseNdiya lisheshe lacacisa zisuka amagqozo. Nge-over yesishiyagalolunye uBumrah ushwibe ingcwenga yebhola u-Aiden Markram ayizwe isikhala ezindukwini. UMarkram ubezitshela ukuthi lizophuma phezu kwezinduku kodwa lakhala ezindukwini.
Ngemuva kwalokho kubuye uYadav okhiphe uKeshav Maharaj (25). Amawikhethi aqhubeke njalo nokuwa kwazise oTemba Bavuma (28), Rassie Van Der Dussen (21), Kyle Verreynne (0), Marco Jansen (7), Kagiso Rabada (15) noLungi Ngidi (3) bonke bafike bahamba.
ElaseNdiya liqale i-Innings yesibili selihamba phambili ngama-run ali-13. Livale usuku lwesibili selenze ama-run angama-57 kuma-over ali-17.
AmaProteas athathe amawikhethi amabili kaKL Rahul (10) noManyak Argawal (7). Bakhishwe nguJansen noRabada.
Usuku lwesithathu luzovulwa nguVirat Kohli (14) noCheteshwar Pujara (9). ElaseNdiya lihamba phambili ngama-run angama-70.