Aqede ehambela phezulu amaProteas osukwini lokuqala
Avale usuku lokuqala ehambela phezulu amaProteas ebhekene neqembu lesizwe laseNdiya emdlalweni wesibili kwemithathu yochungechunge lwama-test ose-Imperial Wanderers Stadium, eGoli.
ElaseNdiya lihamba phambili ngo 1-0 ngemuva kokuguqisa iNingizimu Afrika ngama-run angu-113 kowokuqala obuseSuperSport Park, eCenturion, ePitoli.
Izolo ibamba likakaputeni waseNdiya uKL Rahul uwine ithosi wabe esethatha isinqumo sokuthi ezakhe yizona ezizobhetha kuqala.
ElaseNdiya lenze ushintsho olulodwa eqenjini eliqumbe phansi amaProteas emdlalweni wokuqala.
Ukaputeni weqembu uVirat Kohli uthinteke emhlane kwathi indawo yakhe yathathwa nguHanuma Vihari.
URahul udlalise okomholi eqhubeka nomgqigqo wakhe omuhle wokwenza ama-runs.
Kowokuqala ushaye ama-run angu-100 ku-Innings yokuqala. Kulokhu uhlabane ngama-run angu-50 ngaphambi kokuthi akhishwe nguMarco Jansen ezama ukuliqumba esitendini kodwa wabanjwa nguKagiso Rabada.
Abashwibi bamaProteas badlale ingcwenga yekhilikithi. Lokhu kufakazelwe wukuphuma kwelaseNdiya lisenze ama-run angu-202 kuma-over angu-64.
UJansen obedlala umdlalo wakhe wesibili edlubhe imifaniswano yamaProteas emidlalweni yama-test nguyena obeyiphela endlebeni kwelaseNdiya.
Uthathe amawikhethi amane kuma-over angu-17 wase ededela ama-run angu-31. Ukhiphe uRahul, Mayank Agarwal, Rishant Pant noRavi Ashwin.
Ulekelwe nguDwaine Olivier ongene endaweni kaWiaan Mulder noRabada abathathe amawikhethi amathathu umshwibi ngamunye.
U-Olivier uthathe iwikhethi yakhe ka-50 emidlalweni yama-test edlalela amaProteas ngesikhathi ekhipha u-Anjinta Rahane ngedada esabhekane nebhola elilodwa.
Ujoyine uhla lwezingwazi ezikhethekile ezifana noDale Styen, uShaun Pollock, uMakhaya Ntini, u-Allan Donald, uMorne Morkel, uJacques Kallis, uVernon Philander, Rabada noLance Klusener ukubala abambalwa.
Elaluleli livale usuku lokuqala selihlanganise ama-run angu-35 kuwe iwikhethi eyodwa. Lisele ngama-run ali-167 ukuze lifinyelele esibalweni sama-runs ewakweleta elaseNdiya.
U-Adien Markram ukhishwe nguMohammed Shami nge-Leg Before Wicket (LBW) esashaye ama-run ayisikhombisa emabholeni ali-12.
Ukaputeni uDean Elgar noKeagan Petersen yibona abazovula usuku lwesibili.
U-Elgar unama-run ayi-11 emabholeni angama-57 kanti uPetersen useqoqe ali-14 emabholeni angama-39. Bobabili sebehlanganise ama-run angama-21.
Usuku lwesibili luzoqala lubumbene ihora leshumi ekuseni. Abasazobhetha kumaProteas kukhona uRassie Van der Dussen, uTemba Bavuma, uKyle Verreynne, uJansen, uKeshav Maharaj, uRabada noLungi Ngidi.