Bayazihlangula abezibhedlela zakwaNetcare ngezinsana eziyamaniswa nazo
AbakwaNetcare baphinde bagcizelela ukuthi asikho isiguli esikhulelwe izingane eziyisishiyagalombili noma ngaphezulu esake sangeniswa kunoma yisiphi isibhedlela sabo, okuhlanganisa nesibhedlela iNetcare Sunninghill.
Lokhu kuphendula isimangalo sikaSihlalo we-Independent Media uMnu u-Iqbal Survé sokuthi uGosiame Sithole, umama wezingane ezingaphezu kwesi-8 wayevakashele izibhedlela eziningi eGauteng, okuhlanganisa nesibhedlela iNetcare Sunninghill. Esitatimendeni, uMqondisi Ophethe wakwaNetcare ophikweni lwesibhedlela, uJacques du Plessis, uthe ngaphezu kokuhlolwa kabili kwamarekhodi asesibhedlela, abaphathi baqinisekise kubo bonke odokotela abazimele kanye nodokotela abahlinzayo kulesi sikhungo ukuthi akukho nesisodwa isenzo sabo esike sathintana nesiguli esikhulelwe izingane ezingaphezu kwesi-8.
Kodwa umbiko wophenyo we-Independent Media Group uthi izingane zashushumbiswa ngaphandle kwezwe. Kwavela izinsolo zokuzalwa kwezingane eziyi-10 ezaqopha umlando, nokho, lezi zinsolo azichithiwe njengezindaba ezingelona iqiniso.
Uphenyo olwenziwe yi-Independent Media Group manje seluveza ukuthi umama walaba abashonile wayekhulelwe futhi wabeletha ngokuhlinzwa.UDkt uSurvé uthi, “Kunodokotela ozimele owahlola umama ngemva kokukhululwa futhi wabonisa ukuthi usanda kukhulelwa futhi wayenomthungo wokubeletha wakamuva. Sinobufakazi obuningi, bonke obuphuma kwabezindaba.”
UHulumeni waseGauteng uthi usujube ummeli wombuso ukuthi athathele i-Independent Media Group izinyathelo zomthetho. Lokhu kulandela ukuthi umbiko waleli qembu uveze ukuthi laba ababizwa ngama-‘decuplets’, abaziwa ngokuthi ‘iTembisa 10’, bazalwa ngempela kodwa bashushumbiswa ngaphandle kwezwe.
UHulumeni wesifundazwe uthi ummeli omkhulu usezisiwe futhi amaphepha asenkantolo azohanjiswa ngokuhamba kwesikhathi. Okhulumela uNdunankulu waseGauteng uVuyo Mhaga uthi lezi yizinsolo ezibucayi.
“Sikubhekile ukuzalwa kwezingane kuzo zonke izibhedlela zaseGauteng. Sesithole ukuthi azikho izingane ezazalwa ezibhedlela zikaHulumeni noma ezizimele. Ngemuva kwalokho, senza isivivinyo, ngicabanga ukuthi ngoNhlangulana zili-8 kukhona owesifazane owathi usebelethile.Odokotela bakuqinisekisile ukuthi akukho kuzalwa okwenziwa ngaleso sikhathi noma izikhathi ezahlukene noma ingane yalahleka. Yilapho esimi khona futhi kithina ubuqotho babasebenzi bezempilo abasebenze ngempela kule minyaka emibili edlule ukuze baphonswe nezinsolo ezibucayi,” kwengeza uMhaga.