Inkampani yonogada iyazihlangula ekusocongweni kukaMengameli
Oyinhloko yenkampani ehlizeka ngezokuphepha ezinze eMiami iCTU Security nesolwa ngokuqasha onogada baseColombia okuthiwa babe nesandla ekusocongweni kukaMengameli waseHaiti, u Mnu uJovenel Moise isikuphikile ukubandakanyeka kulokhu. Kayigcinanga lapho kepha iveze nezinsolo zokuthi empeleni ngabavikeli bakamengameli okumele baphenywe.
UMengameli wabulawa ngenyanga eyedlule esemzini wakhe ePort-au-Prince. Lokhu kwalandela ngokuthi kuphunywe inqina kuthungwathwe abasolwa nokwaholela ekuboshweni kwamalungu angomakadebona aseColombia.
Izikhulu zaseHaiti zimile ekutheni i-CTU Security ephethwe nguMnu u-Antonio Intriago, iyiyo eyayiqashe lamasosho. Esitatimendini sabameli baka Intriago lezi zinsolo ziyachithwa: “UMnu uIntriago ubengenalo ulwazi futhi engeyona ingxenye yalesi sehlo esibuhlungu, ” kusho abameli iLacayo Law Firm. Isitatimende siqhubeke sathi:
“Ngesikhathi bengena egunjini lapho bekukhona umengameli bamthole esebanda uNkosikazi wakhe elimele kanzima… Kuyinkolelo yethu ukuthi onogada bakaMengameli yibo abamkhaphele. U Intriago uyisisulu setulo elijulile ” kusho isitatimende.
Ngakolunye uhlangothi ngomlomo weNxusa lase Haiti elizinze eDominican Republic, uhulumeni waseHaiti ucele usizo kwi-United Nations (UN) ekwenzeni uphenyo ngokusocongwa kukaMengameli uMoise. Lesi sicelo sise ncwadini ebhalelwe uNobhala-Jikelele we-UN uMnu u-Antonio Guterres”, kusho inxusa esitatimendeni. Kuyo ngokukhethekile, iHaiti icele ukuba kwakhiwe “ikhomishini yophenyo lwamazwe kanye nenkantolo ekhethekile ezoshushisa abasolwa.”
Le ncwadi esayinwe nguNgqongqoshe Wezangaphandle, uMnu uClaude Joseph, ithe: “iHaiti ithatha ukusocongwa kukaMoise njengobugebengu bamazwe ngenxa yezinsolo zokubandakanyeka kwabangaphandle ekuhleleni, ekuxhaseni nasekusocongweni kukaMengameli “.
IHaiti iphinde yaphakamisa ukuthi ukungenelela kwe-UN kufanele kulandele indlela yophenyo eyalandelwa ngesigameko samavukelambuso eLebanon ngowezi-2005 nokwafa abantu abangama-22 noNdunankulu wezwe.
