IZinyoni sezakhele ngamaqubu eChiefs neSundowns
Umthombo welaboHlanga ongashayi nangephutha eceleni uhlebele leli phephandaba ukuthi Izinyoni azizibekile phansi ngemuva kokushiywa yizilomo.
UNjabulo Ngcobo oqokwe njengomdlali wasemuva ovelele ngesizini edlule ujoyine iKaizer Chiefs. Ulandelwe nguSifiso “Choppa” Hlanti noKgaogelo Sekgota kwathi uGiveni Thibedi wabuyela kuwona Amakhosi abemboleke iSwallows.
“Izikhulu zeSwallows ziphansi phezulu zizama ukuvala izimbobo ezivuleke kuhamba abadlali abamqoka. Yingakho isilande uYagan Sasman obedlala kuChiefs, uKeletso Makgalwa noJody February ebaboleke kuMamelodi Sundowns, uMbulelo Wambi obeyibamba kuTS Galaxy FC, uMphakamiseni Nene oke wabasemabhukwini eMaritzburg United, uMonnapule Saleng we-Orlando Pirates noDillon Solomons obedlala kuStellenbosch,” kusho umthombo ongaphakathi kuSwallows.
USaleng ubegijima kuFree State Stars ngesizini edlule. Nguyena oshaye amagoli amaningi ngesizini edlule kuGladAfrica Championship. Lokhu kuholele ekutheni athengwe yiPirates esithathe isinqumo sokumbolekisa kuSwallows.
USasman ufakwe ohlwini lwabadlali abangekho ezinhlelweni zikaStuart Baxter kuMakhosi.
KuSwallows uzovala isikhala sikaHlanti emuva ngakwesokunxele. UMakgalwa ubelizwa ngendaba ijezi kuSundowns kanti February ubebolekiswe ku-Ajax Cape Town ngesizini edlule. KuSwallows uMakgalwa uzothatha indawo kaSekgota.
ISwallows isanda kumemezela ukuthi isiqede yonke into noMwape Musonda waseZambia.
Leli qembu lizovula ne-Orlando Pirates kuma-quarterfinal eMTN8 ngesonto elizayo.
Usihlalo weqembu uDavid Magosha ethintwa ngalolu daba ucele ukuthi kushayelwe uSipho Xulu oyisikhulu esiphezulu eqenjini. Imizamo yokumthola ayizange iphumelele kwazise ucingo lakhe belukhala kodwa lungabanjwa.