Ulwazi aluthola kwelikhulu luyamsiza uMzimela

Unozinti wa-AmaZulu FC u-Olwethu Mzimela uthi kuyamukhulisa kakhulu ukuzilolonga neqembu elikhulu.

UMzimela oneminyaka yobudala engama-20, ngonyaka wezi-2019 wanyuselwa eqenjini elikhulu esuka enkulisa yalo.

Ngenxa yokungalitholi ijezi eqenjini elikhulu ukudlala ukuthola eqenjini eligijima kuDStv Diski Challenge, nalapho enza kahle kakhulu.

“Ukujima nabantu abadala kuyangikhuthaza kakhulu, ngingasho ngithi kunomthelela omuhle. Bahlezi bekhuluma nami,” usho kanje.

UMzimela umdlali ambalile uMakhehleni Makhaula, ongomunye wabadlali athe bahlezi bemukhuthaza.

Eqhuba uthe: “Ngenza amaphutha amaningi ejimini nangenza ngisheshe ngiwalungise ngaphambi komdlalo.” 

AmaZulu FC Reserve aseqoqweni A, ahlezi endaweni yesibili kuleli qoqo emva kweCape Town City Reserve. Usuthu oluncane lunamaphuzu ayisi-9 kuthi iCape Town City Reserve yona ibe namaphuzu ali-10.

Womabili la maqembu azotholana phezulu emdlalweni ozobanjelwa eMpumalanga Stadium kusasa ngehora le-12 emini.

Ebuzwa ngamalungiselelo uthe: “Kuzoba umdlalo onzima kakhulu lo esiya kuwona, iCape Town City esayihlula emidlalweni emibili ngesizini edlule izoza kuthina izoziphindiselela. Silindele beze kuthina beyiziwengu.”

Kuqala isizini umqeqeshi wa-AmaZulu FC uSiboniso Vilakazi washo wathi uzimisele ukuthi abeke leli qembu endaweni enhle kulogi njengoba liphethe abadlali abancane abanekhono.

UMzimela uthe kumele bagade isikhwishikhwishi seCape Town City Reserve uSanele “Sdava” Gaxa, odlalile kuleli qembu (uSuthu). “Unekhono eliyisamanga, engikwazi ngaye akayena umuntu okhonze ukukhahlela uthanda ukuphasa amabhola ayingozi. Lokho kusho ukuthi kumele sivale izikhala eziyingozi bese beza phambili ukuze singazitholi sisenkingeni,” kusho lo nozinti oke wabizwa eqenjini lesizwe labaneminyaka engaphansi kwengama-20.

ElaboHlanga likhulume naye uGaxa ngaphambi kwalo mdlalo. Lo mdlali uthe akuwona umdlalo wamagqubu lo kuyena.

“Ngahamba kahle kuMaZulu ngilapho engikhona ngenxa yawo, lo mdlalo ngingawufanisa nowobungani kumina ngoba leli qembu lifana nomndeni,” kusho uGaxa.

UGaxa kuzoba umdlalo wakhe wokuqala ebhekana noSuthu kusukela ahamba kulona.

“Enkundleni ngizofike ngenze into engiyaziyo okuwukudlala ibhola elihle, okuyinto engaziwa ngayo,” usho kanje.

Udlale imidlalo emibili nje kuphela washaya igoli elilodwa uGaxa. Okwenza adlale umdlalo owodwa ukuthi  unenkontileka neqembu elikhulu, kwesinye isikhathi usuke ehambe nalo uma lidlala imidlalo yeDStv Premiership.

---

Imidlalo yeDStv Diski Challenge kule mpelasonto ihlelwe kanje:

Kusasa

• IMaritzburg United Reserve neTS Galaxy Reserve, eMpumalanga Stadium ngele-9:30.
• ISwallows FC Reserve neBlack Leopards Reserve, eVolkswagen Dobsonville Stadium  ngele-10:00.
• ILamontville Golden Arrows Reserve neSupersport United Reserve, eSugar Ray Xulu Stadium ngele-10
• IBloemfontein Celtic Reserve  neBaroka Reserve, eDR Petrus Molemela Stadium ngele-10.
• IStellenbosch Reserve neChippa United Reserve, e-Idas Valley Sports Ground ngele-10.
• AmaZulu FC Reserve neCape Town City Reserve ngele-12.

NgeSonto

• ITTM Reserve neKaizer Chiefs Reserve, eLucas Moripe Stadium ngele-9:30.
• IMamelodi Sundowns Reserve ne-Orlando Pirates Reserve, eLucas Moripe Stadium ngele-12.