Imibono eyahlukene ngevidiyo kaRamaphosa enikwa imvilophu
Abanye bathi bekudayiswa izwe
Indawo esesidlangalaleni kanjena iyona kanye okulula ukwenza kuyona inkohlakalo ngoba akukho okubukeka kusolisa futhi angeke unake abantu bezixoxela kugcwele abantu ungeke ubezwe bathini. Kumele asivezele ukuth yini le abenikwa yona njengoba ubudlelwane bakhe nemindeni emithathu ephethe ingxenye engamaphesenti angama-60 eGDP yakuleli enobudlelwane nayo nje akulula ukumethemba. – nguThobani Mazwendoda Madushamxakile Thusini
Kodwa Mhleli wabuza ibhasi libhaliwe. UMengameli wonke enza into enjena, akasanamahloni nokuthi kusemehlweni abantu. Mhlawumbe njengezintatheli, ake niphenye leli xhegu elimnika imvilophu ukuthi lingubani, wakwabani, lithunywe ngubani emthumeni? – nguThandanani Manyathi
Wonke amalungu kaKhongolose akhohlakele, abamhlophe basesemandleni. Benza imali eNingizimu Afrika futhi baphila impilo ewubukhazikhazi phesheya kwezilwandle. Imali yomgwazo leya ngisho nengane encane ingayibona le nto. Bonke laba abavikela i-ANC yingoba kukhona abakuzuzayo kuyona. – nguLindokuhle Nqobane
Akamuniki ngani esandleni nendlela ashesha ngayo ukuyiphosa esikhwameni, le ndoda iyawazi amaSulumane ukuthi anemali. Nibone ngempela ukuthi le ndoda ayizihlanganisi nomuntu ongenamali.– nguLoverse Sibisi
Noma ungayibuka futhi uyihumushe ngayiphi indlela, lena-ke yona kayinambitheki futhi ishayisa ngamahloni. Sinqunu njengezwe uma lokhu kuyilokhu okubukeka kuyikho. – nguCollin Sandile Kansas Khathi
Ngicabanga ukuthi useyabongwa ngobudedengu bakhe kule nto yokhuvethe kanye nokuthatha umnotho kwaboHlanga awuthi thwaxe kulaba. – nguLucky MvelizSon Mkhonza Madonsela
Akuyena yedwa bonke banje ku-ANC akamele aboHlanga usebenzisa bona namaqhawe esizwe asashona ukudayisa izwe bonke kusuka ku-OR Tambo. – nguSabatha
Kusaqhubeka yona imikhuba, kukhona ubufakazi obulahlwayo njengoba engamuniki esandleni kunalokho uyifaka kulesi sikhwama esingeqondakale ukuthi esikabani njengoba behleli, kodwa basaqhubeka lapho babegcine khona. – nguHlengi Dladla
Noma ngabe isipho esihle noma esibi, kodwa indawo esethulwa kuyo nendlela esethulwa ngayo kungenabantu ithimulisa amakhala, ishiya imibuzo. Ilongwe elishunqa ehlungwini livama ukuba yingozi ngoba lingawuvusa umlilo uma lingacishwanga. – nguMunna-Baba E S Nzima
Kusobala ukuthi le mvilophu ayikho emthethweni nangendlela anikezwa ngayo ungafunga ukuthi bashushumbisa iNingizimu Afrika. Uyabona ukuthi ubugebengu bodwa obenziwa lapha, kudayiswa ngezwe. – nguSidlakela Ngema
Ababoni lutho olubi kulokhu
Cishe ikhadi lokubonga noma incwadi. Angithi kade ebavakashele emcimbini wabo kaRamadan. Senifuna sisole nento engekho. Inkohlakalo yenzelwa emahhovisi nasemagunjini asemahhotela lapho okusuke kungekho khona ntatheli. – nguNgcebo S. Mhlongo
Uma senihlaziye naqeda bese-ke nizibuza ukuthi ukube bekunguwena lo onikwa kanje ubunganqaba uthini? Okunye futhi, yini obekufanele ayenze umnikwa uma enikwa ngale ndlela futhi enikelwa endaweni enje into angayazi futhi nokuthi iyini yani? – nguSomathuba KB Buthelezi
UMengameli uqongelela inhlangano imali. Izisebenzi zenhlangano aziholi ngakho-ke kumele aqoqele inhlangano imali. Nginesiqiniseko ukuthi noma ngabe bekuyimali yokugwaza, ngeke walindela usozigidigidi ukuthola imvilophu iza ngale ndlela. – nguSiyabonga Myende
Ngisho ningathini uphethe usazophatha futhi ungcono kabi kunalo, ningafuni ngimbize ngegama niyamazi. – nguMkhe Zizi
Sekwashaywa umhlahlo yini kanti kuBAYEDE nakhu sibhuliswa manje ngento esingazi ukuthi iyini nokuthi kwakukuphi kwenzenjani? – ngu-Azania Buthelezi
Nibulawa ipolitiki nje nina. Kungani ningabikanga ngoZuma edla namaNdiya? Uniphethe-ke uRamaphosa niyathanda anithandi noze nimthande. – nguSbonelo Chiliza
Laba asebesheshe bahlulela ngokuthi kwenziwa inkohlakalo abahambe bayovula icala baveze lobu bufakazi emaphoyiseni. – nguVusi Ncwane Khumalo
Nizoze nihlaziye nje kwakona le ncwajana inikezwa uMengameli yini noma ifakwa ebhokisini? Ningamalabatheka kodwa. – nguMkhize Simphiwe
