Imibandela yokukhethwa kwesekela mengameli eZimbabwe isusiwe
IPhalamende laseZimbabwe ngoLwesibili ligunyaze umthetho wokususa isigatshana kuMthethosisekelo wezwe mayelana nokukhethwa kwamasekela kamengameli, okuyisinyathelo abaphikisi abathi uMengameli Emmerson Mnangagwa (osesithombeni) uhlose ngaso ukugxila emandleni.
IPhalamende liphinde landisa isikhathi sokusebenza kwabehluleli abaphezulu, manje abazoqokwa nguMengameli ngokubonisana nekhomishini yezinsizakalo zokwahlulela, esikhundleni sokuthi kuxoxiswane nomphakathi njengoba kwenzeka manje.
Ngowezi-2013, abantu baseZimbabwe bavotela uMthethosisekelo omusha kuhlanganisa nesigatshana esithi iphini likamengameli kufanele likhethwe kanye nomengameli, kepha lesi sigatshana salengiswa iminyaka eyishumi ngenxa yokuvumelana phakathi kweqembu elibusayo iZANU-PF kanye namaqembu aphikisayo.
IZANU-PF isebenzise ingxenye yayo yokubili kokuthathu ePhalamende ngoLwesibili ukususa lo mbandela, yathi ukuqoka amaphini kamengameli kanye nomengameli kuzodala izikhungo eziningi zamandla ezingadambisa uHulumeni.
Ukususwa kwalesi sigaba kusho ukuthi umengameli uzoqhubeka aqoke iphini lakhe nokuthi uma kwenzeka eshona noma engasakwazi ukusebenza, iqembu elibusayo liyohlangana ukuze kukhethwe ozongena esikhundleni sakhe.
Abaphikisana noMnangagwa bathi ukukhethwa kwamaphini kamengameli kuzodala ukulandelana okuhle futhi kugweme ukungazinzi kwezepolitiki.
Ukwentuleka kohlelo olucacile lokulandelana kuZANU-PF kuholele ekuvukelweni kombuso ngowezi-2017 ngamasotsha ayesekela uMnangagwa futhi ayephikisana neqembu elalihlangene ndawonye nenkosikazi yalowo owayengumholi ongasekho uRobert Mugabe.
Ngaphansi kwezinguquko ezithinta ezobulungiswa, abehluleli eNkantolo YoMthethosisekelo kanye neNkantolo Enkulu sebezothatha umhlalaphansi beneminyaka yobudala engama-75 esikhundleni sengama-70, futhi uMehluleli kuphela ofuna ukuqokelwa ebhentshini okokuqala ngqa ozobhekana nezingxoxo zomphakathi.