Now Reading
Impilo iyaqhubeka kusele ngemuva osekudlulile – uSalah
Dark Light

Impilo iyaqhubeka kusele ngemuva osekudlulile – uSalah

“Okwenzeka eminyakeni emithathu edlule, sekuyinto engayikhohlwa kudala”.

Lawa ngamazwi ashiwo umgadli weLiverpool FC, uMohamed Salah ngaphambi komdlalo wabo neReal Madrid yaseSpain. La maqembu egcina ukutholana kwakuwunyaka wezi-2018 emdlalweni wamanqamu we-UEFA Champions League owawubanjelwe eKiev. Isitobha seReal Madrid esiphinde sibe ngukaputeni wayo uSergio Ramos, sadonsa uSalah waphuka ingalo kusadlalwe isiwombe sokuqala.

Sekuwumlando ukuthi lowo mdlalo wagcina unqotshwe iReal Madrid ngamagoli amathathu kwelilodwa. Indlela okwenzeka ngayo abaningi bathi uRamos wamlimanza ngenhloso uSalah.

“Okwenzeka ngonyaka wezi-2018 sengakudlulisa anginagqubu noRamos. Ngiyazi wayengeke angilimaze ngamabomu. Iqiniso lithi kwaba buhlungu sengibuka lo mdlalo uqhubeka ngingaphandle, ngangizimisele ukusiza iLiverpool FC. Okungijabulisayo ukuthi lo mqhudelwano siwunqobile ngesizini yangowezi-2019/20,” kusho uSalah.

La maqembu azobhekana ngoLwesibili emdlalweni womlenze wokuqala wamaQuarter Final ayo i-UEFA Champions League. Lo mdlalo uzobanjelwa e-Estadio Alfredo di Stefano, eSpain.

Yize kuzobe kuwumlenze wokuqala kodwa kuyinto engabuzwa ukuthi kuzosiphuka izidindi uma la maqembu esetholene phezulu.

Ebuzwa ukuthi ubefisa yini ukubhekana neReal Madrid, kulesi sigaba uthe: “Anginankinga, womabili akulesi sigaba ngoba ekwazile ukuthi anqobe emidlalweni edlule. Womabili la maqembu anabadlali abasezingeni futhi angamaqembu anomlando okuchaza ukuthi akekho onokuthi muncane kunomunye.” 

ILiverpool FC izoya kulo mdlalo sekubuye umgadli wayo uRoberto Firmino olimale esikhathini esingangamasonto amathathu edlule. UFirmino uzobambisana naye uSalah, uSadio Mane kanye noDiego Jota.

Ebuzwa uSalah ukuthi bayazibona yini benqoba lo mqhudelwano uthe: “Sahlulwa kowamanqamu ngonyaka wezi-2018, sawunqoba lo mqhudelwano sanqoba ne-English Premier League (EPL). Okwenza ngisho lokho, ukuthi likhona ithemba lokuthi singawunqoba lo mqhudelwano.” 

See Also

Uthe iReal Madrid inomlando omuhle kulo mqhudelwano ngalokho ingaba yingozi kubona. ILos Blancos (iReal Madrid) kumasizini ali-10 iyinqobe kane i-UEFA Champions League.

IThe Reds (iLiverpool FC) iyiqembu lesithathu elimele i-England, amanye iChelsea FC neManchester City.

IMan City okubukeka izoyithatha i-EPL kule sizini izotholana phezulu neqembu laseGermany iBorussia Dortmund, umlenze wokuqala uzodlalelwa e-England. IChelsea FC yona izoqala ekuhambeni neFC Porto.

Umdlalo obhekwe kakhulu ngoweBayern Munich yaseGermany neParis Saint-Germain (PSG) yaseFrance okwenza lokhu ukuthi la maqembu iwona adlale owamanqamu ngesizini edlule.

Scroll To Top