Amehlo athe njo kuDA KwaZulu-Natal ngomphumela waseGoli
Akukho ukungabaza ekutheni isonto esikulo lilethe izinguquko kupolitiki yakuleli nasekuphathweni komasipala. Ukunqoba kwe-African National Congress (ANC) uMasipala omkhulu iJohannesburg kufakazele eminye yemibiko yaleli phephandaba mayelana nobudlelwano be-Inkatha Freedom Party (IFP) kanye neDemocratic Alliance (DA).
Ngaleso sikhathi leli phephandaba labika ukuthi kukhona ukuvumelana phakathi kwe-ANC ne-IFP eGoli ngesikhundla salowo ozoba yiMeya emuva kokwesula kukaMnu uMashaba owayengene ngethikithi leDA. Lezi zingxoxo nezaphikwa ngabe-IFP ngaleso sikhathi zabe ziphikisana nesivumelwano leli qembu elinaso neDA.
Leli phephandaba selingakuqinisekisa ukuthi ukukhethwa kukaMnu uGeoff Makhubo njengeMeya entsha sekubeke ubudlelwano be-IFP neDA engcupheni ikakhulukazi KwaZulu-Natal. Ngokwezibalo iDA ikhala ngaphansi nje ngamavoti ali-101 kwawe-ANC ali-137 kusolakala ukuthi abe-IFP abahlanu bavote noKhongolose. Ngokomthombo abathile kuDA bafuna ‘ijeziswe iNkatha’ KwaZulu- Natal nayilapho izinombolo zeDA ziyenze yaphatha nokungathi uma lokhu kwenzeka kuphazamise ukuphatha eBaqulusini naseZululand.
Ngokomthombo weBAYEDE ongathanda ukuphawula iqiniso lokuthi kungenzeka ukuthi amalungu amathathu eDA eGoli nawo avote ne-ANC kungenza uMnu uMcwango KwaZulu- Natal acophelele ekuthatheni isinqumo sokwehlukanisa ne-IFP. Zimbili izinto okubukeka zingenza iDA ikholwe wukuthi abe-IFP bayithengisile noma cha.
Okokuqala uma amalungu e-IFP angathola izikhundla eziphezulu kuHulumeni omusha we-ANC bayokubuka lokhu njengomvuzo ‘wokuvota kahle’. Kanti ngakolunye uhlangothi iNkatha ithathele labo ebasola ngokuvota ne-ANC kungenza iDA ikholwe wukuthi abavote ne-ANC yiqeqebana ebeliphikisa ubuholi be-IFP kuzwelonke
