Impumelelo yeMaritzburg neqhaza lomnotho
Ukwenza kahle kwaleli qembu sekushayelwe ihlombe nayiMeya yaseMsunduzi ebona nakowamanqamu izobuya nayo indebe.
Ikomkhulu laKwaZulu Natal kwaNdonga Zibovu eMgungundlovu lizovuka qingqo ngokudlondlobala kweqembu lezikanobhutshuzwayo lakule ndawo iMaritzburg United. Ukwenza kahle kwaleli qembu kuzofukula nomnotho wale ndawo.
Kukhale amakhwela, kwaduma ihlombe ngesikhathi iMaritzburg United ibhaxabula iKaizer Chiefs koweTelkom Knockout (TKO) ngamagoli amabili kwelilodwa ngeledlule eMbombela Stadium. Amagoli avalelwe phakathi uJudas Moseamedi iwona asize iTeam of Choice ukuqopha umlando njengoba ingene okokuqala emdlalweni wamanqamu selokhu yasungulwa. Isiyobhekana neMamelodi Sundowns eMoses Mabhida Stadium zili-14 kuZibandlela.
Leli qembu lidlala imidlalo yalo yasekhaya enkundleni iHarry Gwala Stadium emumatha abalandeli abayizinkulungwane ezili-12. Igcwala ivale ngomuntu ngaso sonke isikhathi uma leli qembu lidlala. Abalandeli sebekhombise ukuba isithako kuleli qembu njengoba le nkundla isiphenduke umphelandaba.
Lokhu kwenza kahle kuzovundulula namakhono kubadlali abadlala emaqenjini amancane kule ndawo njengoba amaqembu azophokophela kuyo ukuzobheka abadlali. UMgungundlovu unomlando wokuba isizinda esikhiqhiza abadlali abasezingeni kubalwa uDumisani Zuma, uNkosingiphile Ngcobo abadlala kuKaizer Chiefs, uBandile Shandu, uBongokuhle Hlongwane abagijima kuyona iMaritzburg United, uKhulekani Madondo olihlikiza kuBaroka FC noSphesihle “Mbesuma” Ndlovu ogijima ku-Orlando Pirates.
Phambilini lesi sifunda sikhiphe abadlali abafana noMbulelo “Old John” Mabizela ogijime ku-Orlando Pirates, neSundowns nakuTottenham Hotspur yase-England; noSandile “AK47” Ndlovu odlalele iMoroka Swallows neBloemfountein Celtic.
Lokhu kwenza kahle kuzophinde kwandise nezihlwele ezivela kuso sonke isifundazwe nakwezinye ezizobe zizobuka imidlalo eHarry Gwala. Ukwanda kwabalandeli kuzohlomulisa idolobha ikakhulukazi osomabhizinisi abasakhula abadayisa ngaphandle kwenkundla njengoba bezobe bedayisela lezi zinkumbi zabalandeli, imboni yezokuthutha izohlabana njengoba kuyiyo ezothutha abalandeli ukuya nokubuya ezinkundleni. Izindawo zokulala, ezokudlela kanye nezokucisha ukoma ngeke zisale ngaphandle kwabazohlumula ngokutheleka kwalezi zinkumbi zabalandeli.
Okunye okulindelekile kulokhu kwenza kahle kweTeam of Choice ukunyuka kwesibalo sabalandeli abathenga ijezi leqembu. Lokhu kuzonyusa imali eyenziwa yileli qembu ngokudayiswa kwejezi lalo. Emidlalweni yeMaritzburg United yasekhaya nasedolobheni imbala kuzoba luhlaza okwesibhakabhaka.
Ukwenza kahle kweqembu kufeza izifiso zomqeqeshi u-Eric Tinkler. Emveni kokusindisa leli qembu ezembeni, ekuqaleni kwale sizini uTinkler wakubeka kwacaca ukuthi isifiso sakhe neqembu ukuqeda kuTop 8 bese benqoba isicoco esisodwa kobe konke sekufeziwe. UDaylon Claasen oyinjini yaleli qembu wavumelana nalo mqeqeshi ngesikhathi efika kuqala isizini ukuthi okumenze wazolidlalela yingoba efuna ukulisiza lenze kahle. Wathi lokho kuzokhonjiswa ukuqeda kuTop 8 nawukunqoba isicoco. Indlela ebheke kulezi zifiso ibukeka ivuthwa. IMaritzburg United ingelinye lamaqembu ayisi-8 ahamba phambili kuPSl emveni kwemidlalo eli-12 iphinde ibe sethubeni lokunqoba iTKO.
UTinkler ufanele ukuchonywa uphaphe lwegwalagwala ngoba ufike iqembu lisanqobe umdlalo owodwa kweli–16 wakwazi ukuguqula izinto lavika izembe sekudlalwa imidlalo yokuhlungela indawo kuPSL nalapho ladlula ngehubo. Selokhu afika iTeam of Choice isidlale imidlalo
IMeya yaseMsunduzi uMzimkhulu Thebolla ushayele iTeam of Choice ihlombe ngempumelelo yayo. “SinguMasipala nomphakathi waseMgungundlovu sizishaya isifuba ngokwenziwe iqembu lethu. Ngithanda nokudlulisa ukubonga kubadlali, umqeqeshi kanye nabaphathi beqembu ngabakwenzile sithi siyaziqhenya ngabo,” kusho uThebolla.
Uphinde wayifisela inhlanhla emidlalweni yayo elandelayo ikakhulu owamanqamu eTKO. engama-29 yahlulwa eli-8 yanqoba eli-13.
