UMntwana usincelisa kogwansile ngomlando wethu
NGIFISA ukuqala ngokuthi ngituse umsebenzi omkhulu owenziwe nguSolwazi uJabulani Maphalala ngokuloba kwakhe ngomlando wesizwe.
Namhla kodwa ngifisa ukuphawula ngokulotshwe nguSolwazi kwelakho lomhla zili- 15 kuNhlolanja kuya zingama-21 kuNhlolanja 2019 ngesihloko esithi: “UMANKULUMANA WAWA EVUKA NENGONYAMA UDINUZULU.”
Lesi sihloko siqoqa konke okungamaqiniso ngalokho uMankulumana kaSomaphunga ayeyikho kuBabamkhulu iNgonyama uDinuzulu kaCetshwayo kuze kufike kumalume wami iNgonyama uSolomon Maphumzana kaDinuzulu.
Kunye nje kuphela engibona nginganecala kwabadala nxa ngisadla amabele uma ngingakuqondisi. Ngumushonje owodwa uSolwazi awulobile ethi: “UMankulumana waba nguNdunankulu wezwe.”
Lokhu akusilo iqiniso. UMankulumana kaSomaphunga wayeyiNduna Enkulu yas’Osuthu. Ephethe zonke izindaba zas’Osuthu, ethetha namacala enkundleni eyayibizwa ngokuthi kuseNkokhokhweni Osuthu. Ubhala kahle nxa ephatha igama likaMgamule Ntombela ngoba yiso kanye leso sikhundla esasiphethwe nguMgamule, wayeyiNduna Enkulu yasOsuthu naye uMgamule.
UMankuluma ungomunye engimthatha njengelinye lamadlozi okubakhona kwami. Kuvele ingxabano embi, impi icishe ishayane ngezifuba phambi kweNgonyama uSolomon kaDinuzulu. Kwakuxabene uMntwana Omkhulu wakwaMinya uMntwana uMnyayiza kaNdabuko njengoba uMntwana uNdabuko wayelamana neNgonyama yasoNdini iNgonyama uCetshwayo. UMntwana uMnyayiza wayexabene neNduna Enkulu yasOsuthu uMankulumana kaSomaphunga. Kubathe iNgonyama uSolomon iyalubiza lolu daba icishe ibambane ngezihluthu phambi kwayo. INgonyama isithi lolu daba seluyehlule ngenxa yalesi simo. Kuvele lona ‘ISHUDU’, ‘ISHUDU’ nguye uMankulumana lithi lo muzi wawuphethwe ngabakwaButhelezi yibo engabe balungisa lolu daba, nakhu-ke bengasezi Osuthu ngemuva kwempi yaKwaNdunu. Lokhu kwadaleka uMalimade ebize iNgonyama uDinuzulu iselibhungwana, iphelekezelwa ngoyise ababili uMntwana uNdabuko kaMpande noMntwana uShingana kaMpande. UMalimade ubatshena ukuthi njengoba uZibhebhu ebalekele eNyoni ngemuva kwempi yaseTshaneni phakathi koSuthu noMandlakazi, uHulumeni wamaNgisi usezombuyisa uZibhebhu abuyele kwaNongoma. INgonyama uDinuzulu ibhodle umlilo, ithi ngeke laba bantu abagwaza uyise iNgonyama uCetshwayo ethangeni babuye beze lapha kwaNongoma. UHulumeni usethi kuMnyamana akeluleke iSilo njengoba wabekade enguNdunankulu weZwe ngaphansi kweNkosi yasoNdini iSilo uCetshwayo futhi kunguye owalanda yena uMntwana uDinuzulu enoMntwana wakwaMinya, uMntwana uNdabuko bamletha Ekushumayeleni emzini kaMnyamana lapha akhuliswa khona nguye uMnyamana. UMnyamana usebeka lesi seluleko eNgonyameni uDinuzulu uthi: “Mntanami ungasishaya yini isimaku somuntu esihola ngoqhotho umnikazi waso akuyeke wena? Ingani uZibhebhu yisimaku samaNgisi na? Uthi angakuyeka wena nxa uthinta isimaku sawo?”
ISilo-ke uDinuzulu asaze sakuzwa lokho. Yilaphoke uMnyamana esethi yena akasekuyingena indaba yokuhlasela uZibhebhu. Wathi abantu abaphetheyo ngabantu beNkosi uma iNkosi isingene ehlathini kwaCeza isihlomela ukulwa noMandlakazi abahlome. Wathi yena uyaziqhelelanisa nalesi senzo, wathi kodwa amadodana akhe amabili uMathentamo eNsukaze noSimelwane kwaNhlonga abahambe neNgonyama nxa isihlomile. La madodana omabili ayentanganye nayo iNgonyama benguPhefeni bobabili ‘imbokodebomvu’. Bahlabana KwaNdunu njengaso iSilo uDinuzulu njengoba singu: “SIHLANU! SAMUHLAMUNYE KWANDUNU.” Njengoba sabulala abantu abahlanu bakwaMandlakazi sona uqobo.
Ngaphambili kokuba kuliwe uHulumeni wacela uMnyamana ukuba aluleke iNgonyama uDinuzulu ukuba ayeke ukuhlomisa impi ehlathini kwaCeza, uMnyamana wayenguMkhulutshana ibutho lakhe, abuthwa yiNgonyama uDingane. Wasebenza ngaphansi kweNgonyama uMpande yaze yambeka ukuthi nguyena yise wezingane zayo. Okwaze kwathi nxa sona iSilo uMpande sithi simganisela indodakazi yaso uMnyamana, uMntwana uMthabayi wakwabo woMntwana wakwaNgenetsheni uMntwana uHhamu wamenqaba. Wathi eNkosini uMpande: “Mina ngingebe ngisaganwa nguMtanenkosi ngoba usuwathi nginguyise wezingane zakho.” Wacela ukuba ingavuma yini nxa uMntwana uMthabayi esale eseganiselwa uBantubensumo eMbongombongweni. Nempela wagana yena. Nakho-ke eseze ebanguNdunankulu wezwe ngaphansi kweSilo sasoNdini iNgonyama uCetshwayo noMdidiyeli wawo onke amabutho empini kaZulu namaNgisi ngowe-1879.
Ngakho-ke ngalesi sikhathi ecelwa ukuthi aye kwaCeza ehlathini ayoluleka iNgonyama uDinuzulu wayesekhulile kakhulu. Wabeke esethumela inkosana yakhe uTshanibezwe ehamba nababemphelekezela. Kwathiwa ngoba bahlomile laba abaneSilo uDinuzulu ehlathini kwaCeza, uTshanibezwe wase enikezwa namasotsha okumphelekezela. Okuthe sebekudebuduze nakwaCeza kwavela ibhojongwana emasotsheni amaNgisi ladubula libhekise isibhamu phezulu uTshanibezwe wathi ngebe esaqhubeka ukufika eNkosini ehlathini ngoba bekungashiwongo ukuthi bazohlasela iNkosi. UTshanibezwe wayesethi akuphendukwe kubuyelwe emuva.
Kuthe uma benze njalo kwasekuqhamuka ibutho liholwa nguMankulumana libaxosha. UTshanibezwe wayeyindoda enomzimba, ihhashi ayeligibele lakhathala eChinsweni. Amabhojongwana lana asebuthweni elaliholwa nguMankulumana athi akagwazwe uTshanibezwe. Kwakhuza uMankulumana wathi: “Lapha enzeni umtakaMnyamana.” Wasinda kanjalo-ke uTshanibezwe ngemuva kwalokho ababe besaya abakwaButhelezi eNdlunkulu. Yingakho-ke nxa udaba lokuxabana koMntwana uMnyayiza neNduna Enkulu yasOsuthu uMankulumana, uMankulumana asho la magama esengiwalobile ethi njengoba iNgonyama uSolomon isithe isiyehlulekile ukulamula uMntwana uMnyayiza neNduna uMankulumana, esethi yena uMankulumana abanikazi balo muzi kwakungabakwaButhelezi.
INgonyama uSolomon esebuza ukuthi ngubani konje osephethe kwaButhelezi. Esesho-ke uMankulumana ethi nguMathole. INgonyama uSolomon esethi uzombiza-ke yena noma sekwabakhona lowo mkhathi azoyilekelela ukulamula uMntwana wakwaMinya uMntwana uMnyayiza (IMBEJE) kanye neNduna uMankulumana, iShudu.
Ngisangena esikhundleni sikababa ngowe-1953 obaba nezinduna ezindala zikababa zazixoxa ngalezi zindaba ukuthi ngenkathi iNgonyama ithumela ukuzobiza ubaba uMathole ukuba azoyelekelela, banqamkana phakathi abanye bathi angabe esayokwenzani njengoba kwathi ngokweluleka kwakhe wase uMnyamana ebizwa ngembuka. Bathi nokho uBaba uMathole wathi uzoya yena Osuthu nxa ebizwa yiNgonyama.
Ngokufushane lezi zikhulu ezazixabene Osuthu zazibanga umuntu wakwaMaphisa uMaqeda, uMankulumana evuna yena.
Lolu daba kuthiwa waluchitha ngosuku lokuqala uMathole ngoba bafika behlomile bonke bephethe zonke izilimazo lezi wathi akusilo isiko ukuza phambi kweNgonyama uSolomon behlomile.
Ngosuku lwesibili bathi walulamula uBaba uMathole. Wathi akuze kungathi nxa sekuvele ummbila omusha ube usulahlwa omdala. Walahla uMankulumana ngecala.
Okuyisimanga wukuthi uMankulumana eneliswa ubulungiswa besinqumo sikaMathole kuthiwa wathi; “MTAKAMNYAMANA UKUBA UMUNTU UYACANGCATHWA NJENGENSIMBI NGABE NGITHI NAMI KANGICANGCATHWE, NGIKE NGIBE PHANSI KWAKHO NGIKUBONE,” esho elahle yena ngecala.
Uthi uMntwana uMagogo sukulumbe kade ebeka isicathulo sotshwala phambi komnewabo iNgonyama uSolomon, wezwa ngandlebenye kungakhulunywa ngaye, iSilo sikhuluma neNduna Enkulu yoSuthu uMankulumana sathi emva kwecala elilanyulwe nguMathole sibonile ukuthi uBukhosi baso ngeke buphelele bengabuyiselwa abakwaButhelezi endaweni yabo. Asazi ukuthi singababuyisa kanjani ukuba bathathe indawo yabo. Uthi uMntwana uMagogo ‘ISHUDU’ uMankulumana wathi eluleka iNgonyama uSolomon; “Ngabe uthatha isithole unike uMathole: UMntwana uthi iNgonyama yathi: “Nginike uMathole isithole ingani izinkomo zakhe kuthiwa zingaphezulu kwezami?” UMntwana uMagogo uthike akabange uMankulumana esayiphendula, wakhomba lapho ayeguqe khona ekhetha utshwala emkhomba ngekhanda kanti uyambona.
Kwabeke sekukhulelwa uMntwana uMagongobelana kaDinuzulu ekhuleliswe lisoka lakhe. INgonyama uSolomon waye esethi akaganiselwe uMathole. Njengoba imizi emkhulu iyavungazela, bathi abanye kuMntwana uMagongobelana akenqabe. Bathi ingani kukhona lokhu kwakwabo. (Besho yena uMntwana uMagogo).
Kwabangemuva kwalokho lapho-ke iNgonyama yanxenxa yena udadewabo uMagogo ukuba ayokwenda kwaButhelezi ukufeza lokho ayeqonde ukukufeza ngokusondeza abakwaButhelezi endaweni yaso eNdlunkulu. Okumangalisayo esikhundleni sokuba kubaleke izintombi, iNgonyama yathi akubaleke izinduna zayo, oMphimbo Ndebele, oCentelunda Zungu, oSichotho Sibiya, oGilbert wathi uMathole atshelwe ukuthi ubalekelwe nguye.
Uthi uMntwana uMagogo ‘ISHUDU’ uMankulumana wathokoza ukuthi avume lokho okushiwo ngumnewabo, wathi sengathi uNkulunkulu angambeka aze ayomganisa. Nempela kwabanjalo, uMankulumana washona ngemuva kwalokho.
Ngaphambili kwalokho engakafi ngoNhlangulana we- 1925, kwafika iNkosana yamaNgisi lapha eNingizimu Afrika uPrince of Wales eyagcina ibekwa iba yiNkosi uKing Edward VIII. Yase ngemuva ibulaxaza uBukhosi ngoba iphikelele ukushada nedikazi umkaSimpson. Kungalolo suku uZulu ebuthane Eshowe efana noZulu eseMakheni, ukubuya kweNgonyama yasoNdini phesheya lapho iNgonyama yamemezela Eshowe ukuthi uNdunankulu wezwe ngaphansi kwayo nguMathole. Wayesaphila uMankulumana ngoba uMntwana uMagogo wendela kwaButhelezi ngowe-1926 washona emva kwalokho uMankulumana.
Okufanele ukuqasheliswa futhi wukuthi iSilo sas’Osuthu iNgonyama uDinuzulu udingiswe elibhungwana. Ubuye lapho ngowe-1897. Kuthe nxa sekuvela iNkosi uBambatha Zondi ethatha umkakhe uSiyekiwe (uMaZondi) nendodakazi yakhe uKholekile wayobafihla emzini weNgonyama uDinuzulu Osuthu ngowe- 1905/1906. INgonyama uDinuzulu yaboshwa emva kwalokho yagwetshwa ejele eNewcastle. Emva kwalokho yakhishwa ejele nguNdunankulu wokuqala uGeneral Louis Botha ngowe-1910. Nokho wasebuye iNgonyama eyidingisela kwaMhluzi eMiddelburg eTransvaal ngaleso sikhathi lapho eshonele khona ngoMfumfu we-1913. Sincane kakhulu isikhathi iNgonyama yas’Osuthu eyahlala ngaso esihlalweni soBukhosi. Yilokhu engibone ukuthi ngikuqondise ngisekhona. Futhi kayikho neyodwa iNgonyama eyake yabeka umuntu ukuba abenguNdunankulu engaphethe isizwe ngokwakhe, kusukela kulo iLembe iNgonyama uShaka uNdunankulu kwabanguNgomane ephethe isizwe sakwaMdletshe. Kwaba yiNgonyama uDingane uNdunankulu kwaba nguNdlela kaSompisi ephethe isizwe sakwaNtuli. Kwaba yiNgonyama uMpande uNdunankulu kwakunguMasiphula kaMamba wakwaNtshangase ephethe isizwe sakwaNtshangase. Kwaba yiNgonyama uCetshwayo kwanguMnyamana kaNgqengelele ephethe isizwe sakwaButhelezi. Bonke laba babevele beyizikhulu. ISHUDU, uMankulumana wayekhonze ngqo eSilweni sas’Osuthu akhe eNgoqongweni endaweni yasOsuthu. Kunguye Induna Enkulu yasOsuthu.
Okunye engingazange ngikukholwe ngeshwa bengingekho nyakomunye uSolwazi uMaphalala enikeza iKing Bhekuzulu Nyangayezizwe Memorial Lecture kwaKhethomthandayo. Ngezwa noma ngingakholwanga ukuthi uSolwazi uMaphalala wathi uNdunankulu weNgonyama uBhekuzulu kaSolomon kwakunguMnu uSimpson Bhengu. Lona uMnu Bhengu ngimazi ngiseyisikhodlwana sengane ngikhula KwaDlamahlahla enguNobhala weNgonyama uSolomon kaDinuzulu. Ngaze ngakhula ngayindoda ngiphethe nomsebenzi wokuqala weSizwe wokwembulwa kwetshe edlinzeni KwaDukuza-nje ngowe-1954 wayekhona uMnu uSimpson Bhengu akakaze abe nguNdunankulu weSilo sakwaKhethomthandayo. Yikho ngithi angikholwanga ukuthi uSolwazi wayengasho into efana naleyo. Nxa kukhulunywa ngeSilo sakwaKhethomthandayo sabekwa ngowe-1948 kwathiwa singuChief wasOsuthu. Kwathi ngowe-1952 kwathiwa sesinikwa igama lobuParamount Chief. Mina ngibekwe ngowe-1953. Ngisebenze naso iSilo sakwaKhetha, ngingasezukwanda nezinto engizenze naso kwaze kwathi sesidlule emhlabeni umngcwabo waso wawuphethwe yimi. Kwakusekhona aBantwana abadala abanjengamadodana eSilo uDinuzulu. Kwakusekhona isiqhoqho sezinsizwa zikamalume wami abafowabo beNgonyama uBhekuzulu. Iningi labo lilidala kunami. Akukho engingakutshenwa ngeSilo sakwaKhethomthandayo. INdlunkulu yaso uMaZungu iNdlovukazi usekhona. Uyazi sisho siphindaphinda sithi nxa kukhona abasho okuthile sithi: “Mina ngiyosebenza ngaye umzala, Qiniso!”