UKlopp unokuzithoba ngamava kaZidane
Ukuzehlisa komqeqeshi weLiverpoool kungenza iReal Madrid ibe wulaza oluzokwengulwa emdlalweni wakusasa
UBUHLAKANI babaqeqeshi, obuhambisana nabadlali abahamba phambili emhlabeni kubukeka kuyikho okuzokwenza ukuthi umdlalo wamanqamu e-UEFA Champions League phakathi kweLiverpool FC neReal Madrid ube ngongena emlandweni.
Lo mdlalo wakusasa enkundleni iNSC Olympiyskiy e-Ukraine akubuzwa ukuthi uzobe ubhekwe izigidi zabantu kwazise la maqembu anomlando kulo mqhudelwano. Uzoqala ngele-20:45 kusihlwa.
Okunye okuwenza uconsise amathe amarekhodi okulindeleke ukuba aphulwe ikakhulukazi yiMadrid.
ILes Blancos (iMadrid) ecijwa uZinedine Zidane uma inganqoba kuzobe kungokwesithathu kulandelana, kwazise le ndebe iyinqobe ngesizini yangowezi-2015/16 iguqisa omkhaya bayo i-Atletico Madrid ngamagoli amahlanu kwamathathu sekukhahlelwa amaphenathi emdlalweni owaphela zibambene ngegoli elilodwa nhlangothi zombili.
Ikuphindile futhi lokho ngesizini yangowezi-2016/17 iguqisa ompetha base-Italy iJuventus, ngamagoli amane kwelilodwa.
UCristiano Ronaldo odabuka ePortugal ongumgadli wayo iMadrid, uma engashaya igoli uzoba ngumdlali wokuqala wokuthi avalele phakathi amagoli angaphezulu kwali-15 kulo mqhudelwano okwesithathu.
Ngesizini yangowezi-2013/14 wavalela phakathi amagoli ali-17, kwathi ngesizini yangowezi-2015/16 wavalela ali-16. Kuyimanje usevalele phakathi ali-15, esewonke amagoli asewashayile kulo mqhudelwano ali-120.
Indlela adlale ngayo la maqembu kule sizini kukhombisa ngokusobala ukuthi azoba maningi amagoli azoshaywa kulo mdlalo.
Ngokwelogi ye-English Premier League (EPL) okuyiligi yase-England esongwe emasontweni amabili edlule, kuyavela ukuthi iLiverpool ecijwa uJurgen Klopp iyawashaya amagoli kodwa nangakuyona ayangena. Ilale endaweni yesine kulogi ngamaphuzu angama-75, ivalele phakathi amagoli angama-84 yangenelwa angama-38.
Nayo iMadrid yenza esifanayo neLiverpool kulogi yeLa Liga ilale endaweni yesi-3 yaba namaphuzu angama-76, ishaye amagoli angama-94 yangenelwa angama-44.
Emlandweni la maqembu asedlale imidlalo emihlanu ezikaKlopp zanqoba emithathu, kwathi ezikaZidane zanqoba emibili.
Okwenza iMadrid ibe izimfivilithi ukuthi yiyo enganqoba lo mqhudelwano owasungulwa ngowe-1955, yingoba iyona esawunqobe kaningi amahlandla ali-12. ILiverpool yona isawunqobe amahlandla amahlanu.
ILiverpool igcina ukunqoba lo mqhudelwano kwakungowezi-2005 lapho yayibhekene khona ne-AC Milan yase-Italy. Kulowo mdlalo yenza ezibukwayo njengoba yakwazi ukuthi ithi ilandela ngemumva ngamagoli amathathu eqandeni, ikwazi ukuthi ilinganise nalapho yafike yanqoba sekukhahlelwa amaphenathi.
UKlopp uthe lo mdlalo yize kuyisifiso sabo ukuthi bawunqobe kodwa ubona kuzoba lukhuni satshe.
“Ngumdlalo onzima kithina, iMadrid inabadlali abanamava, ngingakubali okomqeqeshi wayo uZidane. UZidane kwakunzima ukuthi ubhekane naye ngezikhathi esengumdlali, namanje noma esewumqeqeshi amava anawo ahlezi elinqobisa iqembu. Esikudingayo ukuthi sibambisane ukuze sizibone siqukula inkomishi,” kusho uKlopp esizindenilwebu seLiverpool.
Uqhube wathi akafuni ukuthi umgadli wakhe ogile izimanga kule sizini esanda kusongwa uMohamed Salah afakwe ingcindezi.
“USalah wenze kahle kule sizini kodwa lokho akusho ukuthi sekumele afaniswe noRonaldo. Ugile izimanga kusizini eyodwa, uRonaldo yena usekwenze kumasizini ali-15. Akumele azithwese ijoka kumele aqhubeke nje nokwenza kahle. Sizofika isikhathi sakhe, okwamanje wuRonaldo noMessi abahamba phambili emhlabeni,” kubeka uKlopp.
USalah uyena ovalele phakathi amagoli amaningi ku-EPL angama-32 wakhanda ali-10. Uqokwe njengomdlali ovelele, waba umdlali ovelele weLiverpool. Uphinde waqokwa naseqenjini elenze kahle ngesizini yangowezi-2017/18 ku-EPL. Uphule irekhodi elabekwa uRonaldo lokushaya amagoli angaphezulu kwangama-31 ngesizini eyodwa ku-EPL.
Abadlali okulindeleke ukuthi bathwalise kanzima izitobha zeMadrid, uRoberto Fermino noSadio Mané abavutha bengabaselwe. Abanye u-Alex Oxlade-Chamberlain kanye naye uSalah onamagoli ali-10 kulo mqhudelwano.
Uma ubheka kuMadrid abangaba yingozi kuLiverpool, uGareth Bale, uMarco Asensio, u-Isco, uLuka Modric noRonaldo.