Izokhunjulwa ngedili lomculo indlovukazi uMama Afrika

IZOHLONISHWA ngedili lomculo indlovukazi yomculo wase-Afrika, uMiriam Makeba owashona ngowezi-2008.

Kuleli dili elaziwa nge-A Tribute to Mama Africa, intokazi yaseThekwini, uThulile Zama neqembu lakhe bazoqhulula amanoni ale ndlovukazi okubalwa iPata Pata, i-African Sunset, iNomeva, iSoweto Blues. Lokhu kuzokwenzeka ngoLwesihlanu lo mhla zingama-23 kuNdasa eThe State Theatre, ePitoli.

UThulile ongumculi wejazz uthe ukuba nezwi elihle kukaMakeba, ukulwela amalungelo abantu, ukwakha isithombe esihle ngezwekazi i-Afrika emazweni omhlaba ikona okumgqugquzelile kokuningi empilweni kuhlanganisa nomculo.

Leli dili lokuhlonipha uMakeba liqale ngoMasingana, eSeaman’s Corner, eHammarsdale, eThekwini. Nalapho uThulile oneziqu zomculo azithole e-University of KwaZulu-Natal (UKZN) washiya abantu befuna impinda. EThe State Theatre, uzobe ehambisana noDavid Smith, uRebekah Doty noSbusiso Mkhonza. UMakeba ungomunye wabaculi abandizisela phezulu ifulegi laseNingizimu Afrika emazweni omhlaba ngomculo wakhe owawungahlonizi ngendlela aboHlanga ababephethwe ngayo ngaphansi kukaHulumeni wobandlululo.

Sisekuzo ezabesifazane kujazz, kubhekwe ukuthi umzwilili uSisanda Nilsson enze into yamehlo kuSunday Jazz Sundowners ezoqala ngehora lesithathu eBAT Centre, eThekwini.

Le ntokazi esibuya eLos Angeles seyike yanandisa emicimbini emikhulu enjengo-Ugu Jazz Festival, iDurban Jazz Festival, iFrizon. Ngowezi-2015 ikhiphe iculo elithi “Indlela Yami” elididiyelwe nguMondli Ngcobo. Ngesikhathi ise-Europe ikhiphe elithi “If This Is Love”.