Kuyamdida ukufika kwezibabuli uKomphela


Akasayizwa eyokuhlala emuva uSteve Komphela uthi sekufanele behlasele unomphela uma bezimisele ngesicoco
ISIKHALO sokungasayini abadlali abanohlonze kweKaizer Chiefs sesingumlando kubalandeli njengoba ngenyanga eyedlule isayine okhilimu babadlali abalandeli ababekade bebafuna. Noma lokhu sekwenzekile imiphumela ayikawavumi kahle Amakhosi okwenza abalandeli nongcweti bakanobhutshuzwayo besole umqeqeshi uSteve “Mphathi” Komphela ukuthi akakazihlanganisi kahle izinkuni zokuphemba njengoba imiphumela ingakahambi njengoba kulindelekile.
IChiefs isayinise abadlali abahlonishwayo esingabala kubona uLeornado Castro, uSiphelele Ntshangase, uKabelo Mahlasela yase ikhuphula uSiphosakhe Ntiya Ntiya obegijima enkuliseni yayo. Okwenza abalandeli bahhewule uKomphela ukuthi babona sengathi ilanga liyashona njengoba sekusele imidlalo eli-10 ku-Absa Premiership ngaphambi kokuba isongwe, kanti nezicoco seziyashoda sekusele eseNedbank Cup kuphela eqale ukubangwa maphakathi nesonto.
IChiefs izotholana neGolden Arrows emdlalweni weNedbank Cup Last 32 ngeSonto, eFNB Stadium, ligamenxe elesithathu ntambama. Njengoba sekusele izindebe ezimbili vo kule sizini (uma singabala nese-Absa Premiership), uKomphela uthi okuzosiza ezakhe ukuze kube khona ezikutholayo okungumthobanhliziyo uma kuphela isizini ukuthi zihlasele zingabe zisahlala emuva kwazise zineziklwibhisi zabadlali abakwaziyo ukuya phambili futhi abalibonayo ipali.
Ukuvumile ukuthi usadideka, ukuthi aqale ngobani ayeke bani njengoba bonke abadlali bekhombisa ukuba sefomini muva nje.
“Kuzofanele sizihlasele izitha ukuze sizokwazi ukushaya amagoli sinqobe izicoco. Kona kuzofanele ngikuvume ukuthi abadlali abasha abafikile kusenzima ukukhetha ukuthi uzoqala ngobani uyeke bani. Umbuzo enginawo ilowo wokuthi ngabe ngiqala ngoCastro noma ngoMoon? Bese umbuzo uthi uma uthi uqala ngoCastro ngabe uthi uMoon oseshaye amagoli amathathu emidlalweni emine umbeka ngaphandle? UNtshangase udlala kahle kakhulu, kepha ngabe uqala ngobani phakathi kwakhe noSiphiwe Tshabalala osesakhele amagoli amaningi kule sizini? Okunye esingakwenza ukuthi sibadlalise bobabili uTshabalala noNtshangase, kodwa futhi bese sidlala ngomgadli oyedwa, okusafanele sikhethe futhi ukuthi ngabe yimuphi. Kungakho ngithi konke lokhu kuncike ekutheni umdlalo unjani nokuthi sidlala nobani,” kuchaza uKomphela ngesikhathi ezakhe ziziqeqesha ngoLwesibili emini.
Echaza ngomdlalo wezakhe naBafana Bes’thende, uKomphela uthe balindele umdlalo onzima.
“Ngesikhathi sigcina ukudlala nabo, sidlale ngokulingana emdlalweni we-Absa Premiership kuba yiqanda nhlangothi zombili ngasekupheleni konyaka owedlule. Kuzoba ngumdlalo onzima kakhulu kithina kwazise sifuna ukusinqoba isicoco seNedbank Cup. Ngiyayiqonda indlela abaqeqeshi be-Arrows abasebenza ngayo ngiyacabanga nabo bayayiqonda indlela engisebenza ngayo ikakhulukazi isekela lo mqeqeshi uMandla Ncikazi engisebenzile naye kuMaritzburg United. Kuzoba ngumdlalo onzima kakhulu, esethembayo ukuthi uzoba namagoli,” kusho uKomphela.