Siya ngokushabalala isibhakela sosondonzima
Umunwe ukhomba kubaqhathi bezimpi abangakukhuthalele ukugqugquzela izimpi kulesi sigaba esasihlonishwa umhlaba wonke
UMA ukhuluma ngempi yosondonzima okuthiwa yiRumble in the Jungle eyayiphakathi kukaGeorge “Big George” Foreman noMuhammad “ The Greatest” Ali eyayingoLwesibili lo mhla zingama-30 kuMfumfu ngowe-1974 e-20th of May Stadium, eKinshasa, eZaire eseyaziwa ngeDemocratic Republic of the Congo (DRC) nomuntu ongawulandeli umdlalo wezamankomane uyazi ukuthi kusuke kukhulunywa ngani.
Kule ndumezulu okwakubangwa kuyona ibhande leWBC neleWBA Heavyweight kwanqoba u-Ali ngomngqimuzo womlalisa phansi sewuyophela umzuliswano wesi-8. Le mpi eyayinezethameli ezingaphezu kwezi-60 000 yayiphromothwa nguDonald King owayengumqhathi wezimpi wase-USA.
Lo mqhathi wezimpi owayethathwa njengobaba wezimpi zosondonzima abuye adume ngokuqhatha impi yodumo eyaziwa ngokuthi yiThe Thrilla in Manila okwakulwa kuyo u-Ali noJoe “Smokin’Joe” Frazier bebanga izicoco ezifanayo kusona belu eseHeavyweight. Yayilwelwa eQuezon City, ePhilippines mhla lulunye kuNcwaba ngowe-1975. Kwagcina kunqobe u-Ali ngomzuliswano we-14.
Ngaphandle kwalabo sondonzima bekukhona enye inqwaba kakhulimu efana noLarry “ The Easton” Homles oke waphatha ibhande le-IBF neleWBC. Amagilavu uwabeke ethala ngowezi-2002. Ushaywe ezimpini eziyisi-9 kwezingama-69. Abanye ngo Mike “Iron” Tyson engalibaleki kwananingi namanje impi yakhe noFrank Bruno yangowe-1996, uLennox Lewis naye ophathe izicoco eziningi, uReddic “ Big Daddy” Bows obeke amagilavu ethala ngowezi-2008. Kuleli besigabe ngoCorrie “The Sniper” Sanders, uFrancois “White Buffalo” Botha, uJacob Mofokeng, uGerrie “Boksburg Bomber” Coetzee nabanye.
Kule minyaka kuyinto ebonwa nayingane ukuthi lehle ngendlela eshayisa ngamahloni izinga lamaHeavyweight. Umbuzo wanoma yimuphi umlandeli wesibhakela ngothi ngabe yini imbangela yalokhu?
Uma ukhuluma nezinkakha zomdlalo wezamankomane zikutshela zingananazi ukuthi isibhakela sosondonzima sibulawa ngabaqhathi ngezindlela eziningi. UThulani “Sir” Magudulela ongumnikazi weLudonga Boxing Promotions esike yaqhatha izimpi zosondonzima abafana no-Anthony Nel, uWiseman “ Sabalutho” Dlomo, uThabiso “The Rock” Mchunu no-Ilunga “Junior” Makabu uthi isibhakela sosondonzima safa mhla uDon King ethatha isinqumo sokuyeka ukuqhatha izimpi. Uthi nakuba bebeziqhatha izimpi zamaHeavyweight abafana noBob Arum weTop Rank Boxing Promotions, u-Oscar Dela Hoya weGolden Boy Promotions kodwa bebengenalo uthando lwezimpi zosondonzima njengoKing.
UMagudulela uthi uKing iningi lo sondonzima ubelivumbulula uma kungama-Olympics. “Noma uKing engowaseMelika kodwa ukuhlala enza imiqhudelwano yezimpi zosondonzima kwakwenza nabanye ophromotha emazweni ahlukene bakukhuthalele ukuqhatha izimpi zamaHeavyweight. Ukuqhatha iRumble in the Jungle eDRC neThe Thrilla in Manila ePhilippines kwakungenye yezindlela yokudayisa izimpi zosondonzima emhlabeni jikelele,” kubeka uMagudulela. Lo mqhathi uthi esinye sezizathu esibulele osondonzima wukuthi kuyabiza ukwenza izimpi zabo. “Uma uzokwenza impi yosondonzima kumele wazi ukuthi uzongena impela ephaketheni. Kunzima nokubaqeqesha ngoba kabajimi ngendlela efanayo neyabanye abashayisibhakela. Kudingeka ube nabaxhasi uma uzokwenza izimpi zabo. Ngesinye sezizathu lesi esidala abaqhathi bezimpi besimanje bazibalekele izimpi zabo,” esho kanje.
UZola Koti wodumo lokucija uMzonke “The Rose of Khayelitsha” Fana uthi okubulala isibhakela salesi sisindo wukuthi abaqhathi sebevele bafake impi yamaHeavyweight eyodwa qhwaba uma benza imiqhudelwano. “ Ngenxa yalokhu kabasekho abashayisibhakela abafuna ukuba ngamaHeavyweight. Ubufakazi balokhu yikhehla elingu-Anton Nel elisaphethe ibhande lakuleli. Kawasekho amaHeavyweight amasha azomphuca leli bhande. Nginethemba lokuthi uma ophromotha bengazandisa izimpi zawo emiqhudelwaneni abayenzayo lingabuya udumo lwamaHeavyweight. Ngokwendalo abantu abayathanda noma bayakujabulela ukubuka isibhakela sabantu abakhulu. Kumele kubekhona okwenziwayo,” kubeka uKoti ojobelele nangokuthi ukuba yindlala kwezimpi kuleli kunomthelela.
U-Alex Mchunu ongiyise kaThabiso “The Rock” Mchunu nophinde abe ngumqeqeshi uthi noma bangaba khona osondonzima abafana noDeontay Wilder ongumpetha weWBC, uTyson Fury ophethe iWBA neWBO, u-Anthony Joshua oyingqwele ye-IBF nabanye abanjengoWladimir Klitschko, uDavid Hey kodwa ngeke bafike ezingeni lesizukulwane so-Ali. Naye usola abaqhathi ngalokhu. Uthi izinga lamaHeavyweight lehliswa wukuthi abaqhathi baba nosondonzima ababaphethe, abafuna ukubanika udumo ngayo yonke indlela. Ngenxa yokuthi uthi kufanele labo sondinzima bahlale benqoba. Balwiswa namavukana amanye awo athathwa ngisho emigwaqeni. “Uzwa kuthiwa usondonzima othile uzinqobe zonke izimpi asezilwile ezingama-30. Uma sewumbuka elwa ushaywe ngamahloni ngenxa yesibhakela esingasile asilwayo. Lokhu kudalwa wukuthi abaqhathi babo babakhande ngokubalwisa namavukana. Abaqhathi bayabavalela osondimzima ababona ukuthi bazophazamisa labo ababaphethe. Lokhu kudala ukuthi laba abashiywa ngaphandle bawulaxaze lo mdlalo,” kubeka uMchunu. Uthe nokushoda kwezimpi kudala ukuthi abantu abebengaba ngamaHeavyweight babalekele kweminye imidlalo efana nebhola lo mbhoxo.