Inhlangano yomphakathi ebheka ukuphepha kwabantu eNanda ithi ihlaselwa yizigebengu
I-Inanda Community Policing Forum (CPFs) ithi isimo sisenzima kuleli lokishi njengoba manje sebehlaselwa yizigebengu. Enye yezinselelo bathi ukushoda kwezinsiza okubashiya besengozini yokuhlaselwa yizigebengu.
Indawo yaseNanda, esenyakatho nedolobha, ingelinye lamalokishi amakhulu eNingizimu Afrika. Isivele ithathwa njengenye yezindawo eziyingozi kakhulu KwaZulu-Natal. Eminyakeni emibili edlule, le ndawo ike yaqopha amacala abucayi, okubalwa awokubulala nokudlwengula. Ezibalweni zobugebengu zekota edlule, iNanda ibinamacala amaningi okubulala abikwayo kuleli.
Sekuyiminyaka abantu bendawo bekhala ngezinga eliphezulu lobugebengu. Yize amaphoyisa nezinhlangano zomphakathi besebenzisana, ama-CPF athi lokhu kubeke impilo yawo engcupheni.
“Angazi ukuthi kungani beze baze basibulale. Yilokho abakwenzayo okwamanje. Bavele badubula wonke umuntu, ngisho nathi esikhona nje. Iningi lozakwethu lidutshulwe langcwatshwa emasontweni ambalwa edlule ngenxa yezinga eliphezulu lobugebengu eNanda,” kusho uSihlalo we-CPF eNanda uMbongeni Phewa.
NgoMasingana, abantu abahlanu okusolwa ukuthi bangamalungu eqembu lezigebengu endaweni batholakala beshonile enkundleni yezemidlalo endaweni yaseBhambayi. Kuboshwe amalungu omphakathi ali-12 athweswa amacala. Abantu bakule ndawo basola ukuthi bebesatshiswa amalungu eqembu lezigelekeqe, elaziwa ngokuthi yiWest.
Kubulawe amalungu amaningi aleli qembu ngesikhathi edubulana namaphoyisa nabanye baboshiwe. Intsha yakule ndawo ikholwa wukuthi ukuntuleka kwemisebenzi kunomthelela ekwenyukeni kwezinga lobugebengu.
“Siyazidinga izinhlelo, amathuba omsebenzi ayadingeka ngoba imbangela enkulu yobugebengu wukuthi iningi labantu alisebenzi futhi lihleli alenzi lutho. Ngikholwa wukuthi lokhu kuzophela uma kuhlelwa izinhlelo zokulwa nobugebengu,” kusho isakhamuzi.