Isexwayiso sokuzithwala kubadlali bePirates


Uxwayisa iqembu lakhe ngobungozi bokuzithwala umqeqeshi we-Orlando Pirates uJose Riveiro ngemuva kokuthi ezakhe zibhudluze iLamontville Golden Arrows ngayisi-7/1 emdlalweni weDSTV Premiership obuse-Orlando Stadium ngoMgqibelo ebusuku.
EZimnyama zinqobe ngamagoli kaTshegofatso Mabasa ohlohle amathathu, uRelebohile Mofokeng, uSandile Mthethwa uKabelo Dlamini noKarim Kimvuidi.
Exoxa nabezindaba ngemuva komdlalo uRiveiro udonse ezakhe ngendlebe ngokuthi zingalinge ziyifake ikhanda impumelelo yangempelasonto.
“Akumele sicabange ukuthi njengoba sithela i-Arrows othulini ngalolu hlobo sekuzoba lula. Ngeke kube lula. Wonke amaqembu afuna imiphumela ngenxa yezizathu ezahlukene. Yingakho kubalulekile ukuthi singabe sisawudedela umgqigqo wokunqoba kuze kuyophela isizini,” kuchaza uRiveiro.
IPirates ihlezi endaweni yesithathu manje kulogi yeDStv Premiership.
“Kumele siyishayele ihlombe i-Arrows ngokuthi ibizelapha ukuzodlala ibhola. Ayizange ibe amagwala. Okusisebenzele wukusebenzisa amathuba ethu,” kuchaza uRiveiro.
EZimnyama zisethubeni elihle lokubuyela emqhudelwaneni yeConfederation of African Football (Caf) ngesizini ezayo.
Kule sizini zisheshe zaphuma kweyamaqoqo eCaf Champions League.
“Ngijabule ngefomu kaMabasa. Wenza kahle kakhulu. Ukuzethemba kwakhe kuphezulu. Ngiyethemba uzoqhubeka nale fomu.” kusho uRiveiro.