USeema uncoma imisebenzi kakaputeni weqembu labo
Umqeqeshi weSekhukhune United, uLehlohonolo Seema, utusa ukaputeni uLinda Mntambo ngokwenza kahle kwakhe muva nje.
Selokhu ebuye ekulimaleni isikhathi eside kulo nyaka, uMntambo useshaye amagoli ayisithupha emidlalweni emine.
NgoLwesibili lo mdlali oteketiswa ngokuthi uFigo eshaye amagoli amabili ngesikhathi iSekhukhune United itholene phezulu neCape Town City ePeter Mokaba Stadium emdlalweni weDStv Premiership. Lowo mdlalo waphela amaqembu ebambene ngamagoli amabili.
Nangempelasonto edlule uMntambo ushaye igoli lesibili ngesikhathi iSekhukhune United ihlula i-Orlando Pirates okuyiqembu aphuma kulona.
“Kuyajabulisa ukumbona enza kahle indawo ayidlalayo uyayiqonda kangcono, ifomu yakhe iyalilekelela kakhulu iqembu. Kodwa angifuni ukugxila ekutheni ngilokhu ngimncoma, ngoba uma sikhuluma iqiniso ngoLwesibili bonke abadlali balwile. Ngiyakholelwa ukuthi umdlalo bekumele siwunqobe kodwa kwangenzeka” kusho uSeema.
IBabina Noko izovakashela eDanie Craven ukuyobhekana neStellenbosch, eyenza kahle kakhulu njengoba ingakaze yehlulwe emidlalweni eli-19 edlule kuyo yonke imiqhudelwano. Lo mdlalo kulondeleke ukuthi ube ngoMgqibelo ngele-20:00.
Ngaphambi komdlalo kuzokuba nomzuzu wokuthula lapho kuzobe kukhunjulwa lowo obeyisitobha seKaizer Chiefa uLuke Fleurs odlule emhlabeni izolo ebusuku ngesikhathi kade bemduna imoto.
