Amaqembu ezepolitiki aseMali afuna ukhetho
Amaqembu ezepolitiki eMali acele ukuthi kubekwe isikhathi sokhetho lukamengameli ngemuva kokuthi iqembu elibusayo lihlulekile ukuhlela ukuvota phakathi noshintsho oluthathe izinyanga ezingama-24 lokubuyela entandweni yeningi.
IMali ibilokhu ibuswa amasosha kusukela ngoNcwaba wezi-2020, okwaba ngukuqala kokuvukelwa kwemibuso okuyisishiyagalombili eNtshonalanga naMaphakathi ne-Afrika eminyakeni emine, okuhlanganisa nomakhelwane bayo iBurkina Faso kanye neNiger. Izinhlaka zezifunda bezizama ukuxoxisana ngezinguquko kodwa ohulumeni besikhashana bahudula izinyawo.
Umbutho obusayo eMali wathatha amandla ngesikhathi kuketulwa umbuso okwesibili ngowezi-2021 futhi kamuva lathembisa ukuthi lizothatha izinyanga ezingama-24 kusukela ngoNdasa kowezi-2022 ukubuyisela ukubusa kwabantu, okuzoqala ngoNdasa zingama-26 kowezi-2024 bese kuba nokhetho ngoNhlolanja.
Yaphasisa umthetho omusha wokhetho ngoNhlangulana wezi-2022, kodwa yathi ngoMandulo nyakenye izoluhlehlisa ukhetho lukaNhlolanja ngenxa yezizathu zobuchwepheshe, nokuqubule intukuthelo phakathi kwamaqembu ezepolitiki.
Abaningi baphinde baphawula bezwakalisa ukukhathazeka ngemuva kokuphela kwesikhathi soguquko ebesihleliwe kwenyanga edlule ngaphandle kokhetho. Esitatimendeni esihlanganyelwe ngasekupheleni kweSonto, amanye amaqembu ezepolitiki amakhulu eMali kanye nezinhlangano zomphakathi zicele iziphathimandla ukuthi zenze uhlaka lwesikhungo lokuvota ngokushesha okukhulu.
“Sizosebenzisa zonke izindlela ezisemthethweni ukuze kubuyiswe ukuhleleka okujwayelekile komthethosisekelo ezweni lethu,” kusho isitatimende esinabasayini abangaphezu kwama-20, okuhlanganisa nomfelandawonye omkhulu wamaqembu aphikisayo kanye neqembu likamengameli owaketulwa. IJunta ayizange iphawule ngalesi sitatimende.
Umbutho obusa eMali sewuvele wehlulekile ukugcina isithembiso sokuqala sokubamba ukhetho ngoNhlolanja wezi-2022, nokwadala unswinyo oluqinile lwe-Economic Community of West African States (ECOWAS). Lokho kwalimaza ubudlelwano neFrance , eyahoxisa amabutho ngowezi-2022 ayelwa nokuvukela umbuso okuqhubeka iminyaka eli-12 esifundeni.
I-ECOWAS, indikimba enkulu yezepolitiki nezomnotho eNtshonalanga Afrika, igcine isuse unswinyo lwaseMali ngemuva kokushicilelwa komthetho omusha wokhetho. Khonamanjalo iChad eholwa ngumbutho ihlelelwe ukubamba umzuliswano wokuqala wokhetho lukamongameli ngenyanga ezayo kulokho okuzoba ngowokuqala kohulumeni bezempi esifundeni ukubuyisela uMthethosisekelo.
