Kungale komdlalo enkundleni okweCitizens neLos Blancos
Kuzovuka amagqubu uma sekuhlangana iReal Madrid neManchester City kumaQuarter Final e-Uefa Champions League ngenyanga ezayo.
Lezi zingqungqulu zamaqembu ziqhathwe ndawonye ngoLwesihlanu ngesikhathi i-Uefa itomula amaqembu azotholana phezulu kumaQuarter Final alo mqhudelwano omkhulukazi wamaqembu e-Europe.
Sekuyinsakavukela umchilo wesidwaba ukuhlangana kwala maqembu kulo mqhudelwano.
Umlenze wokuqala uzodlalelwa eMadrid mhla ziyisishiyagalolunye kuMbasa ngelesi-9 ebusuku bese kuthi owesibili ubeseManchester mhla ziyishumi nesikhombisa kuMbasa ngehora lesishiyagalolunye ebusuku.
Kula masizini amabili adlule aqhuthane amazenze kweyandulela amanqamu. Intatheli yelaboHlanga uZipho Singela isibhekela izizathu ezenza lomdlalo uhlabahlose.
1. Ukuphendulwa ompushana kweReal Madrid bephendulwa yiCity e-Etihad:
Ngesizini edlule amaCitizens abukisa ngeMadrid e-Etihad kowandulela amanqamu. Umlenze wokuqala waphela ngo 1-1 eSantiago Bernabéu, eMadrid, eSpain. ICity yafika eManchester yavuka umbhejazana italabha iMadrid ngo 4-0. Igcine inqoba ngo 5-1 sekuhlanganiswe umphumela umdlalo wokuqala nowesibili. IMan City idlulele kowamanqamu yafika yanqoba okwenza yaqeda isizini nezicoco ezintathu.
2. Ukudliwa kweCity kowandulela amanqamu kumasizini amabili adlule:
AmaCitizens yize ekwazile ukubuyisa izinduku ngesizini edlule kodwa ngeke akhohlwe ukuthi iMadrid iyona eyabakhipha kowandulela amanqamu kumasizini amabili adlule. IMan City iyona eyanqoba ngo 4-3 emlenzeni wokuqala kwathi kowesibili iMadrid yaphumelela ngo 3-1. Sekuhlanganiswe umphumela womdlalo womlenze wokuqala nowesibili iMadrid yanqoba ngo 6-5 ngemuva kwalokho yafika kowamanqamu yaba ngompetha.
3. Impi yabaqeqeshi abajaha amarekhodi:
UCarlo Ancelotti noPep Gaurdiola bobabili bajaha amarekhodi kulo mqhudelwano. Bahlukaniswe yisicoco esisodwa. U-Ancelotti usenqobe izicoco ezine ze-Uefa Champions League kanti ujaha esesihlanu. Wanqoba ezimbili ne-AC Milan. Usevele usenezimbili neMadrid. Ngakolunye uhlangothi uGaurdiola uphethe ezintathu. Unqobe ezimbili neBarcelona kwathi ngesizini edlule wathola esesithathu. Njengamanje ugaqele esesine okuzokwenza alingane no-Ancelotti ngezine.
4. ICity ifuna ukulandela ezinyathelweni zeMadrid:
Kusukela iChampions League yadlalwa ngalolu hlobo isidlalwa ngalo manje, iMadrid iyona kuphela esaphumelele ukuvikela lesi sicoco. Isadlalwa ngohlelo lakudala ayisishiyagalombili amaqembu ake ayivikela. Eqhulwini kuneMadrid, ilandelwe yiBenfica, i-Ajax Amsterdam, i-Inter Milan, iBayern Munich, iLiverpool, iNottingham Forest, ne-AC Milan. ICity igaqele ukujoyina amaqembu aseke azuza lo mlando.
