Iyakhula ingcindezi yokuphenya ngesibhicongo sabasePalestine
IFrance neGermany bajoyine iziphakamiso ngoLwesihlanu zokuthi kwenziwe uphenyo oluzimele ngokushona kwezinkumbi zabantu basePalestine abalindele usizo eGaza, isigameko abezindaba bakwa-Israel abathi singanciphisa isimo sakwa-Israel emhlabeni jikelele ngemuva kokuthi amasosha edubule esixukwini ebesilinde usizo.
Iziphathimandla zezempilo eGaza zithe amasosha akwa-Israeli abulale abantu basePalestine abangaphezu kwe-100 abebezama ukufinyelela ezimotweni ebezilethe usizo ngaseGaza City ekuseni ngoLwesine.
U-Israeli usole ukufa kubantu abaningi ezixukwini ebezigcwele amaloli osizo, uthi izisulu zanyathelana noma zagingqika. Isikhulu sakwa-Israeli siphinde sathi amasosha “abe nempendulo elinganiselwe” kamuva adubula ezixukwini ayenomuzwa wokuthi ziyingozi.
Lesi sigameko sigcizelele ukujula kwenhlekelele yabantu kanye nokuwohloka kosizo oluhlelekile ezindaweni ezisenyakatho yeGaza ehlaselwe amasosha akwa-Israeli njengengxenye yokusabela kwabo ekuhlaselweni okubulalayo kuka-Israel yiqembu lamaphekula asePalestine iHamas ngoMfumfu ziyisi-7.
UMengameli waseFrance u-Emmanuel Macron uzwakalise “intukuthelo ejulile” kanye “nokugxeka okunamandla kwalokhu kudubula”. UNgqongqoshe Wezangaphandle, uStephane Sejourne, uthe iParis izokweseka uphenyo oluzimele olufunwe nguNobhala Jikelele we-UN u-Antonio Guterres.
UNgqongqoshe Wezangaphandle waseGermany u-Annalena Baerbock uthe: “Ibutho lakwa-Israeli kumele lichaze ngokugcwele ukuthi ngabe kwenzeke kanjani ukududulana kwabantu okuholele ekutheni kudutshulwe abanye.” Izwe elisondelene kakhulu no-Israeli, i-USA, iphinde yanxusa ukuthi kwenziwe uphenyo olunzulu, lithi lesi sigameko sikhombisa isidingo “sokwandiswa kosizo lwabantu olubhekiswe eGaza”.
Kwa-Israel, isiqephu sombono esingosini yezindaba ku-inthanethi iN12 sithe lesi sigameko sigcizelela ukungabi bikho kwanoma yikuphi ukuphathwa komphakathi noma umthetho eGaza, nokuthi lokhu “kungase kubeke u-Israeli esimweni esinzima mayelana nokuba semthethweni kokuqhubeka nokulwa”.
Umlobeli wephephandaba elikhulu lansuku zonke uYedioth Ahronoth uthe noma yini eyenzeka ngesikhathi sokulethwa kosizo, isithombe esizogcinwa umhlaba wonke kuzoba ngamakhulu abantu “abalambile nabaphelelwe yithemba” okuhlanganisa nabesifazane nezingane abalindele ukudla futhi badutshulwa amasosha akwa-Israeli.
“Abanye bacabanga ukuthi lesi sigameko sizodala ushintsho empini… sizofaka ingcindezi yamazwe ngamazwe u-Israyeli angeke akwazi ukumelana nayo, okuhlanganisa neWhite House,” kusho isitatimende.
Impi yaqala ziyisi-7 kuMfumfu ngonyaka odlule ngesikhathi iHamas igasela isuka eGaza ingena kwa-Israeli, yabulala abantu abayi-1 200 futhi yathumba abantu abangama-253, ngokusho kwezibalo zakwa-Israel. Umkhankaso wezempi wakwa-Israel usubulale abantu basePalestine abangaphezu kwezi-30,000 eGaza, kusho iziphathimandla zezempilo endaweni ephethwe yiHamas.
