UTshisekedi uyavuma ukuhlangana noKagame ngezingxabano empumalanga yeDRC
UMengameli waseDemocratic Republic of Congo (DRC), uFelix Tshisekedi usevumile ukuhlangana nozakwabo waseRwanda, uPaul Kagame ukuze badingide izindlela zokuxazulula ingxabano eqhubekayo empumalanga yezwe lakhe.
Laba baholi ababili bebengaboni ngaso linye mayelana nokuvukela umbuso kweM23 osekudlule nemiphefumulo yabantu abangaphezu kwesigidi empumalanga yeDRC kusukela ngowezi-2021.
Ngemuva kwezinyanga ezisabisa ngokumemezela impi ebhekene neRwanda, uMengameli wase-DRC useyichithile le nkulumo. Isitatimende soMnyango Wezangaphandle e-Angola sithi uTshisekedi usevumile ukuba nezingxoxo noKagame ukuze kubhekwane nodweshu oluseMpumalanga yeDRC.
Lokhu kuvezwe ngemuva komhlangano phakathi kukaMengameli waseDRC kanye nozakwabo wase-Angola uJoao Lourenco. I-African Union (AU) yajuba umholi wase-Angola ukuthi aqhube umhlangano phakathi kwalaba baholi ababili ukuze kugwenywe impi ehlanganisa amazwe abo.
Ubudlelwano phakathi kwe-DRC neRwanda buphazamisekile ngenxa yokuvuka kabusha kwamavukelambuso eM23 empumalanga yeDRC. Iziphathimandla zaseCongo zisola iRwanda ngokweseka amavukelambuso eM23 ukuze aphange izimbiwa zayo.
IRwanda iyaliphika icala futhi yasola iDRC ngokusekela amavukelambuso ahlomile aseRwanda aziwa ngokuthi yiFDLR afuna ukuketula uHulumeni wayo. Uphenyo olwenziwe ngongoti be-UN ngonyaka odlule lwathola ukuthi womabili la mazwe ayeseka amavukelambuso.
Impi phakathi kwamasosha kaHulumeni namavukelambuso eM23 isishube futhi yaphoqa abantu abangaphezu kwezi-140 000 ukuba bashiye amakhaya abo emasontweni edlule.
Kunokwesabela ukuthi lokhu kungqubuzana kungase kubhebhetheke kakhulu kube wumbango wesifunda lapho kutshalwe amasosha eSouthern African region, iSADC, alwa ngokubambisana nebutho laseDRC.
UMkhandlu Wezokuphepha we-UN usanda kuba nomhlangano ophuthumayo wanxusa ukuba kuthathwe izinyathelo ngokushesha zokunciphisa ukungezwani phakathi kweDRC neRwanda.