UThe Rock kweleWBC nowase-Argentina
Uzolwela ibhande lomhlaba ngaphansi kweWorld Boxing Council (WBC) umshayisibhakela waKwaZulu-Natal (KZN), uThabiso “The Rock” Mchunu.
UThe Rock odabuka KwaXimba uzongqimuzana noYami Alberto Peralta wase-Argentina empini yebhande lesiliva leWBC ngaphansi kwesigaba seCruiserweight.
Le mpi izobanjelwa e-Olive Convention Center mhla zingamashumi amabili nambili kuNdasa.
UNomvelo Shezi weMvelo Boxing Promotion nguyena ozobe ehlele le ndumezulu yempi okubhekwe ukuthi idonse izinkumbi zabathandi bamankomane.
UMchunu useke waliphatha leli bhande phambilini. Amathikithi empi yakhe noPeralta aseqalile ukudayisa. Abiza i-R100 bese kuthi awezicukuthwane abize ama-R500. Abafuna ukuhlala eduze kweringi bazohlukana ne-R1 000.
ElaboHlanga lithole izindaba zokuthi le mpi izokwesekwa yiHhovisi lezemidlalo nehhovisi lezokungcebeleka eKZN.
“Ngizizwa ngikhethekile ngokuthola ithuba lokuqhatha impi enkulu njengale ezoba phakathi kukaThabiso noYamil. Laba ngabashayisibhakela ababili abaseqophelweni eliphezulu okufakazelwa umlando wabo. Angingabazi ukuthi bazosinika impi eseqophelweni eliphezulu,” kubeka uShezi esitatimendeni esithunyelwe kwabezindaba.
Le mpi izosakazwa bukhoma kuSABC.
“UThabiso usemele iKZN ezingeni lomhlaba ngokwezinga eliphezulu. Uyithemba lamankomane futhi ukulungele ukulwela ukuphatha leli bhande. Sifuna ukubonga nabobonke abaxhasi abenze isiqiniseko sokuthi le mpi iba khona,” kubeka uShezi.
