UMkhonto Wesizwe uzendlale eBukhosini bakwaNgcolosi
Emuva kwempumelelo yerally yoMkhonto Wesizwe (MK) ebibanjelwe enkundleni yezemidlalo KwaXimba eCato Ridge ngeSonto okubonakale kuyo abaholi bomdabu namakhosi akhele lendawo leliqembu liphakamise ukuba amakhosi angashiywa ngaphandle ezintweni ezenziwa ezindaweni aziphethe.
Ekhuluma kulo mbuthano umholi waleli qembu uMnu uJacob Zuma uthe kudala enqamula ubusuku nemini exoxisana namakhosi nabefundisi emphakathini. Ukuphawula kwakhe kwenanelwe abaholi bendabuko nabefundisi bamahlelo ehlukene abebezimazise lombuthano.
Emuva kwawo iqembu lithe lizohambela izindawo zamakhosi liyozethula lixoxisane nawo. Zisuka nje amadaka namuhla ngoLwesibili ubuholi baleli qembu obuphuma ezingeni likazwelonke buhambele ubukhosi besizwe sakwaNgcolosi enkantolo yesizwe ku Ward 8 ngaphansi kukaMasipala weTheku.
Ngokusho kwesimemo inhloso yokuhlangana nenkosi yakwaBhengu bekuwukuzo, wethula uMbutho uMkhonto Wesizwe kuNdabezitha. Selokhu lo mbutho wamenyezelwa ngokusemthethweni ngasekupneleni konyaka odlule, usubambe imikhankaso eminingi ngaphansi kwezindawo ezingaphansi kobuholi bakwaNgcolosi. Le ndawo inedumela ngokuba nedamu elikhulukazi iNanda Dam elisingatha imicimbi enhlobonhlobo.
Ilungu lombutho elingagunyaziwe ukukhuluma nabezindaba lithe amakhosi nobuholi bendabuko bayisisekelo sakho konke okwenzeka emphakathini ngakho awukwazi ukuthi ungaba yiqembu eliphumelelayo uma lesi sakhiwo usishiya ngaphandle.