Ingwe nengonyama phakathi kukaDjokovic no-Alcaraz embangweni
Isibabuli somdlali webhola lomphebezo odabuka eSpain, uCarlos Alcaraz sisethubeni elihle lokuqeda umgqigqo kaNovak Djokovic ku-Australian Open.
U-Alcaraz okleliswe endaweni yesibili emhlabeni ebholeni lomphebezo usephenduke imbangi enkulu kaDjokovic okleliswe endaweni yokuqala emhlabeni.
Le ntwana eneminyaka engamashumi amabili ifike kwezwakala ebholeni lomphebezo.
Ngonyaka odlule iqumbe uDjokovic phansi kowamanqamu we-Wimbledon kwelamaNgisi.
U-Alcaraz ubhekene nejoka lokuqeda ukucanasa kukaDjokovic ku-Australian Open.
Njengamanje uphethe izicoco eziyishumi kulo mqhudelwano. Akayazi induku kusukela ngowezi-2018.
Usedlale imidlalo engu-28 ilandelana engashaywa. Irekhodi lika-Alcaraz emiqhudelwaneni emikhulu (Grand Slam) yilona elimbeka ethubeni lokwenza ezibukwayo ku-Australian Open.
Emidlalweni engu-50 emikhulu usanqobe engu-41 kanti ufinyelele kweyandulela amanqamu emiqhudelwaneni emikhulu emine eyedlule.
Lo mdlali waseSpain akagcini nje ngokunqoba kuphela kodwa indlela adlala ngayo iyona eyenza abe nogazi kubalandeli bebhola lomphebezo.
Ukhonze ukushaya izitayela uma esenkundleni okuyinto ethakaselwa yizihlwele yonke indawo lapho edlala khona.
Wonke amehlo azobe ethe njo kuyena. Njengamanje uphethe izicoco ezimbili ezinkulu. Ngo-2022, ukhale wemuka ne-US Open kwathi ngodlule waguqisa uDjokovic kuWimbledon.
Ugaqele isicoco sakhe sesithathu esikhulu. Nokho wazi kahle ukuthi kuzomele aqale aqede ngoDjokovic uma efuna ukukhonya.
Ngeviki eledlule uqumbe uDjokovic phansi emdlalweni wesihle kuRiyadh Season Tennis Cup ebibanjelwe eSaudi Arabia. Unqobe ngo 4-6 6-4 6-4. Ukubuye kade elandelana ngemuva. I-Australian Open izoqala ngeSonto ekuseni.
