Ibhodi elidala leBSA liphumela obala ngesikhulu esibhekene nezinsolo ezibucayi
Licacisa ngembiko yokuhoxiswa kwezinsolo ezibhekene noMandla Nthlanganiso ibhodi elidala leBoxing South Africa (BSA).
Ngonyaka odlule ibhodi leBSA elisanda kuphuma ehhovisi yamisa uNthlanganiso kulandela izinsolo zokuthi akazange alibone iphuthwa elenziwa nguPhakamile Jacobs oyimenenja yeBSA esifundazweni sase-Eastern Cape.
UJacobs waphambanisa izibalo okwaholela ekutheni uMelissa Miller anikwe ibhande leBantamweight kwabesifazane kade ebhekene noSharadane Fortiun e-International Convention Center (ICC) e-East London.
Ngemuva kwezinsuku ezintathu iBSA yalilungisa leli phutha impi yaphela ngokulingana.
UNthlanganiso owayeyiChief Operation Officer (COO) wagcina emisiwe esikhundleni sakhe.
Ekupheleni konyaka odlule kusabalale imibiko yokuthi izinsolo ebezibhekene noNthlanganiso zihoxisiwe futhi uzoba yibambe lesikhulu esiphezulu seBSA.
Lokhu kuholele ekutheni ibhodi elidala likhiphe isitatimende lichitha lemibiko.
“Ibhodi elidala lifisa ukuqinisekisa ukuthi liyibonile imibiko ekhomba ukuthi izinsolo ezibhekene noMandla Nthlanganiso zihoxisiwe futhi usemenyezelwe njengesikhulu esisha esiphezulu seBSA. Sifuna ukukuqinisekisa ukuthi asikaze sizihoxise izinsolo ezibhekene naye futhi asikaze simethule njengebamba lesikhulu esiphezulu kuBSA. Ngesikhathi kuphela isikhathi sethu ehhovisi mhla ziyishumi nanye kuZibandlela ngonyaka odlule uNthlanganiso wayesamiselwe izinsolo ezibucayi kabi. Namanje usabhekene nazo,” kuchaza isitatimende.
Ukuhlakazwa kwebhodi elisha
Ungqongqoshe wezeMidlalo uZizi Kodwa wamemezela ibhodi elisha ngasekupheleni konyaka.
Lokhu kuholele ekutheni inhlangano yabaqhathi eNingizimu Afrika iludlulisele enkantolo ephakeme lolu daba. Nangempela ifike yaphuma phambili okwenze ibhodi elisha lahlakazwa.
Njengamanje iBSA ayinalo ibhodi elisha kanti kubhekwe isinqumo sikaKodwa.