AmaProteas avule unyaka omusha ngenduku eKapa
Avule unyaka omusha ngebatha amaProteas equnjwa phansi yiqembu lesizwe laseNdiya emdlalweni we-Test yesibili eNewlands Cricket Ground, eKapa.
INingizimu Afrika iguqe ngamawikhethi ayisikhombisa. Ekugcineni la mazwe abambane ngo 1-1 kulolu chungechunge lwemidlalo emibili yama-Test.
Kowokuqala amaProteas anqobe nge-Innings nama-run angama-32. Njengamanje wonke amehlo abethe njo emdlalweni wesibili oqale osukwini lwayizolo.
Ukaputeni woMzansi, uDean Elgar obambele uTemba Bavuma odonseke umsipha kowokuqala uwine ithosi wabhetha kuqala.
AmaProteas akhishwe ngehlazo lama-run angama-55 kuma-over angama-24. UMohammed Siraj uthathe amawikhethi ayisithupha kwathi uJasprit Bumrah noMukesh Kumar bathatha amabili umdlali ngamunye.
UDavid Bedingham noKyle Verreyenne yibona kuphela abashaye ama-run angaphezu kwayishumi ku-Innings yokuqala yamaProteas.
NelaseNdiya lithwale kanzima selibhetha okufakazelwe wukuphuma kwalo lonke selenze ama-run ali-153.
UKagiso Rabada, Nandre Burger noLungi Ngidi bonke bathathe amawikhethi amathathu kwathi enye kwaba yi-run out kaBurger okhiphe uSiraj.
AmaProteas aqale i-Innings yesibili ekweleta ngama-run angama-98 ngaphambi kokuthi abekele elaseNdiya isibalo sama-run azosijaha uma esebhetha ku-Innings yalo yesibili.
Ezika-Elgar zivale usuku lokuqala sezibeke ebhodini ama-run angama-63 kusawe amawikhethi amathathu osukwini lokuqala. Bezisakweleta amanye ama-run angama-35.
Enkundleni bekuno-Aiden Markram noBedingham. Namuhla ekuseni kuhluphe uBumrah ovele wavuka inj’ebovu. Ubengabazi nokuthi bayini ababhethi beNingizimu Afrika bezwa ngaye njengoba bekukhala esakhe isichathulo.
Ukhiphe uBedingham, Verreyenne, Marco Jansen, Keshav Maharaj noNgidi ngokuphazima kweso. Ugcine ethathe amawikhethi ayisithupha ku-Innings yesibili yamaProteas.
INingizimu Afrika isizwe yinkani kaMakram oshaye ama-run angama-106 emabholeni angama-103.
Ngaleyo ndlela elakuleli likwazile ukubekela iNdiya isibalo sama-run angama-76 obekumele isijahe kule nkundla okunzima ukubhetha kuyona.
ElaseNdiya lizabalazile laze layoshaya intambo lase linqoba ngamawikhethi ayisikhombisa.
AmaProteas abedinga amawikhethi ayishumi ukuze anqobe. Athole amathathu atholwe nguRabada, Burger noJansen. USharma no-Iyer yibona abaweze iNdiya ngelibanzi. KwelaseNdiya kuphume uJaiswal, Kohli noGill.
USiraj uqokwe njengomdlali ovelele kwathi u-Elgar wathatha umklomelo womdlali oshaye into ecokeme kuyona yombili imidlalo.
KweyeT20 la mazwe abambane ngo 1-1 kwathi kweyosuku olulodwa kwanqoba elaseNdiya ngo 2-1. Ngenyanga ezayo amaProteas azovakashela iNew Zealand kuchungechunge lwemidlalo emibili yama-Test.
