Now Reading
IMpofana Heroes Cup nenhloso yokuvundulula ikhono endaweni yaseMooi River
Dark Light

IMpofana Heroes Cup nenhloso yokuvundulula ikhono endaweni yaseMooi River

Ihlose ukuqeda isihlava sokuhlunyezwa kwezidakamizwa, amacala okushaya nokuveza ikhono, iMpofana Heroes Cup edonsa izinkumbi zamaqembu aqhamuka ezindaweni ezahlukene esifundazweni saKwaZulu-Natal (KZN).

Lo mqhudelwano wasungulwa ngowezi-2005 isiteki sakhona sisayizi-5 000 wamarandi.

Njengamanje isiteki sesikhule saze safinyelela kwizi-R50 000 eqenjini elidla ubhedu kulo mqhudelwano.

UMsawenkosi Duma ongumhlezi womqhudelwano utshele elaboHlanga ukuthi amaphoyisa akawuvali umlomo ngomehluko owenziwa yilo mqhudelwano.

“Inhloso ngqangi yalo mqhudelwano wukubeka imasipala waseMpofana ebalazweni. Sifuna ukulekela abafana abancane ekutheni baveze ikhono labo. Ngeke sikubalekele ukuthi ibhola selinemali manje. Usuyakwazi ukuziphilisa ngalo. Indawo yethu yindawo ecashile. Ngakho amathuba afana nalawa amqoka kakhulu etsheni. Simeme izinhloli emaqenjini ahlukene afana noRoyal AM, Maritzburg United, AmaZulu, noLamontville Golden Arrows ukuthi bazohlola ikhono kulo mqhudelwano,” kubeka uDuma.

Lo mqhudelwano uzoqala mhla zingamashumi amabili nambili kuZibandlela uze uphothulwe mhla zingamashumi amabili nesithupha kuZibandlela.

Uzodlelwa eMooi River. Kulindeleke ukuthi wakhiwe amaqembu angamashumi amathathu nambili.

“Baningi kakhulu abantu asebekwazile ukuzibonakalisa ngenxa yalo mqhudelwano. Inhloso yaMasipala waseMpofana wokugcina intsha imatasa ngalamaholidi kaZibandlela. Phela ngalesi sikhathi sonyaka zibankulu izibalo zamacala okushaya avulwa eziteshini zamaphoyisa. Selokhu lomqhudelwano uthuthukile, amaphoyisa alibeka ngembaba elokuthi izibalo zamacala okushaya namanye ajwayelekile ngalesi sikhathi sonyaka ehle kakhulu,” kuqhuba uDuma.

See Also

Amaqembu azoqhathwa ngoLwesihlanu ngehora le-10 eBruntville Hall, eMooi River. Imidlalo izodlalelwa eMooi Primary School naseBruntville Stadium.

“Inhloso yethu wukuthi sibenamaqembu angamashumi amathathu nambili kodwa ngonyaka odlule besinamaqembu angamashumi amathathu neyisishiyagalombili. Sibophele amaqembu asuka eNewcastle, eThekwini, eMtshezi naseMgungundlovu,” kubeka uDuma.

Abasafisa ukujoyina bangaxhumana noMsawenkosi Duma ku-063 500 9965 noma uBonginkosi Nkosi ku-082 381 8364.

Scroll To Top