UNjilo ugqimuze uBig Zulu wase ecela uCasper Nyovest esitikini
Umuhluze uBig Zulu ngamaphuzu ngemuva kwalokho wacela esinye isihlabani seHip Hop, uCasper Nyovest, esitikini usomabhizinisi waseMgungundlovu, uPhumlani Njilo.
Le mpi ebibhekwe ngamehlo abomvu nendonse izinkumbi zabantu ibibanjelwe e-Olive Convention Center, eThekwini namuhla ebusuku.
Ijaji lokuqala impi liyinike uNjilo kwathi elesibili lanquma ukuthi lezi zinsizwa zibambene kwathi elesithathu layinika uNjilo.
UBig Zulu uqale kahle emzuliswaneni wokuqala ejikijela odalimende bezibabhekela kuNjilo.
Iqhinga likaNjilo licace zisuka. Ubegijiima iringi yonke ngenhloso yokukhathaza uZulu.
UNjilo ubuye ngamandla ngomzuliswano wesithathu nowesine. UZulu ubesebenzisa ubude bakhe bethambo namandla ukuzama ukuvalela uNjilo ekhoneni bese eyagadla.
Ngemuva kwempi, uNjilo ucele uNyovest okewalwa noNaak Musiq ngonyaka odlule eSuncity, eNorth West.
“Ngifuna ukubonga bonke abantu abangisekile. Ngijabule ngokuphumelela lempi ebingelula kodwa iqhinga lami nomqeqeshi lokukhathaza uBig Zulu ngozungeza iringi lisebenzile. Bengilokhu ngimtoboza isisu waze wakhathala. Manje sengifuna uCasper Nyovest empini yami elandelayo,” kubeka uNjilo.
Usaziwayo bebephuma ngobuningi ukuzoseka lempi. Phakathi kwabo bekukhona uDJ Tira noZwake.
UZulu umbongela uNjilo kodwa wabalisa ngesinqumo samajaji.
“Ngifuna ukubongela uNjilo ngokunqoba. Angicabangi ukuthi kukhona engikwenze kabi. Into engixakayo wukuthi lomuntu ubengibamba izinyawo impi iqala yaze yayophela. Angiphikisani nokunqoba kwakhe. Mhlawumbe yimina ongayazi imithethu yamankomane,” kushaya uZulu ngamafuphi.
UHlula Dladla weHlula Dladla Boxing Promotion utshele izinkumbi zabalandeli ukuthi ufuna ukuqhatha uDJ Tira noNyovest.
“WeNjilo ngeke uzikhethele. Wena ngizokuqhatha nomuntu ongangawe ngesisindo uKhuzani Mpungose (ongumculi kaMaskandi) bese kuthi uDJ Tira ngimqhathe noCasper. Ozonqoba uzobhekana noZulu,” kuchaza uDladla.
