UMphela uthipha uFoster noTau kweyerekhodi likaMcCarthy kuBafana

Irekhodi likaBenni McCarthy lamagoli amaningi kuBafana Bafana selihlale iminyaka eyishumi nane kungekho oliphulayo.

UMcCarthy osecija abagadli kuManchester United egijima ku-English Premier League (EPL) wabhakuzisa enethini amagoli angamashumi amathathu nanye emidlalweni engamashumi ayisikhombisa nesishiyagalolunye phakathi kowe-1997 nowezi-2012.

Le ngwazi yamela iBafana Bafana eNdebeni yoMhlaba yangowezi-2002 eJapan/Korea. Yaqeda ibambene ngamagoli ayishiyagalombili no-Ahmed Hassan ku-Africa Cup of Nations (Afcon) yangowe-1998.

UMcCarthy uphinde aphathe irekhodi lokuba nguyena umdlali oseke washaya amagoli amane emdlalweni owodwa egqoke imibala yeqembu lesizwe.

UKatlego Mphela noBernard Parker bacishe baliphula irekhodi likaMcCarthy kuBafana eminyakeni eyedlule.

Bobabili bavelele enethini amagoli angamashumi amabili nantathu. UMphela exoxa nelaboHlanga utshele leli phephandaba ukuthi uPercy Tau noLyle Foster yibona abasethubeni lokwephula irekhodi likaMcCarthy.

“UPercy noLyle basabancane. Into emqoka umgqigqo. Uma wenza kahle eqenjini lakho ithuba lokugqoka ijezi leqembu lesizwe lihlale lizovela. Angifuni ukuqamba amanga kunzima ukwephula leli rekhodi. Akulula okwangempela. Izimo zenza kubenzima ukwephula leli rekhodi. IBafana nje idlala kangakani onyakeni? Mhlawumbe amahlandla amane. Uma beqhubeka nomgqigqo wokushaya amagoli futhi benza kahle bangaliphula leli rekhodi,” kuchaza uMphela.

UTau useyalingana usehlohle amagoli ayishumi nane kwelesizwe kusukela adlala umdlalo wakhe wokuqala ngowezi-2015.

Usebheke ukwedlula uSiyabonga Nomvethe onamagoli ayishumi nesithupha.

Ngemuva kwalokho kuzobe sekumele adlule uPhil “Chippa” Masinga owadlula emhlabeni enamagoli ayishumi neyishiyagalombili.

UTau usedinga amagoli ayishumi nesikhombisa ukuze afice uMcCarthy. Okwamanje usahlalelwe yijoka lokwedlula uNomvethe (16), Masinga (18), Mphela noParker (22) noShaun Bartlett (28).

“Angisiboni isidingo esingavimba uPercy Tau noLyle Foster ekubeni baphule leli rekhodi. Ekugcineni kukhona okumele aliphule. Amarekhodi kuwumgomo ukuthi aphulwe,” kusho uMphela namanje okusakhulunywa ngegoli alishaya ku-Iker Cassillas oyingwazi yeReal Madrid ngesikhathi kuqhubeka iFifa Confederation Cup eNingizimu Afrika.

UTau uneminyaka engamashumi amabili neyishiyagalolunye. Mhla ziyishumi nantathu uzobe ehlanganisa iminyaka engamashumi amathathu. Usehlohle amagoli ayishumi nane emidlalweni engamashumi amathathu nane.

“ULyle wenza kahle. Naphesheya kwezilwandle izinto ziyamvuma. Okwesithathu akafani njengoPercy yena udlala njengomgadli. Isikhathi esiningi uPercy udlala njengomdlali wangasohlangothini,” kuchaza uMphela.

UFoster usebhakuzise enethini amagoli amane emidlalweni eyishumi nanye kuBafana.

Okwamanje ubesanikwe ikhefu lesikhashana kulandela ukubanjwa yisifo somzwangedwa. Lokhu kuholele ekutheni angabi yingxenye yemidlalo yakamuva yeBafana ebidlala neBenin neRwanda.

“Ngemuva kwethu noBernard Parker ngangithi uKermit Erasmus uzolephula leli rekhodi. Angazi kwenzakalani ngaye. Kukhona okumele agcine eliphulile. Ngiyethemba uzoba phakathi kukaPercy noLyle,” kulandisa uMphela.

NgoMasingana iBafana izobhekisa amabombo ku-Afcon ezobanjelwa kwelase-Ivory Coast.

“Imiqhudelwano ifuna ube nomgqigqo ukuze ubesethubeni lokuphumelela. Kuyajabulisa ukubona iBafana izibekisela indawo ku-Afcon ngoba besingekho ngeyedlule. Abafana benze umsebenzi oncomekayo. Ngibafisela sengathi bangadlulela esigabeni esilandelayo ku-Afcon. Akulula ukudlala emazweni ase-Afrika. Ngeke usiqonde isimo uma ungekho khona.” kubeka uMphela.

IBafana iboshelwe eqoqweni elilodwa neMali, Tunisia neNamibia. Amaqembu amabili aqede phezulu azodlulela esigabeni somkhumulajezi.

IBafana yagcina ukunqoba i-Afcon ngwezi-1996 ngesikhathi ingosokhaya balo mqhudelwano. Igcine ukudlala kuwona ngowezi-2019 ifinyelela kuma-quarter final lapho yakhishwa khona yiNigeria.

UStuart Baxter nguyena obehola iqembu lesizwe ngaleso sikhathi. Wonke amehlo azobe ethe njo kuHugo Broos ekutheni aphinde izimanga azigila neCameroon ngowezi-2017 edla umhlanganiso.

Uhla lwabadlali abahamba phambili ngamagoli emlandweni weBafana Bafana:

Igama:       Isibongo:   Imidlalo:      Amagoli:

Benni         McCarthy       69                 31 

Shaun        Bartlett          74                 28

Katlego      Mphela          53                 23 

Bernard      Parker           73                 23 

Phil              Masinga       55                18 

Siya             Nomvethe     81               16 

Percy          Tau                34                14