Now Reading
ISundowns ethubeni lokubalwa nezinkunzi zamaqembu aphesheya
Dark Light

ISundowns ethubeni lokubalwa nezinkunzi zamaqembu aphesheya

IMamelodi Sundowns igaqele irekhodi eliphethwe izikhondlakhondla zamaqembu ohlonishwayo emhlabeni. Njengamanje leli qembu selidlale imidlalo eyishumi layinqoba yonke yaqoqe amaphuzu angamashumi amathathu.

Muva nje isobozele iSekhukhune United, iKaizer Chiefs, iOrlando Pirates, iLamontville Golden Arrows, iRichards Bay Football Club, iPolokwane City, neStellenbosch FC kule sizini kweyeligi. Isalelwe eminye imidlalo engamashumi amabili okumele yenze isiqiniseko sokuthi iqhubeka nomgqigqo eqale ngawo. Emlandweni webhola eNingizimu Afrika alikho iqembu eselake laqeda isizini yonke yeligi lingayazi induku.

ISundowns ibheke ukuba yiqembu lokuqala ukwenza lokho. Ivele isinqobe isicoco seligi amahlandla ayisithupha elandelana okungumlando.

Intatheli yelaboHlanga uZipho Singela isibhekela amaqembu aseke aqeda isizini engayazi induku kweyeligi emhlabeni.

Glasgow Rangers:

Leli qembu laseScotland lidle isicoco seligi ngaphansi kobuholi bukaSteve Gerrard ngamaphuzu ayikhulu nanye (101) ngaphandle ngaphandle kwenduku. Ngokwenza lokhu iRangers ibe yiqembu lesihlanu ukuzifaka emabhukwini alo mlando okhethekile.

Celtic:

Ngo-2016/17, iCeltic izifake emlandweni ngokuba yiqembu lokuqala eScotland ukuphakamisa isicoco seligi ngaphandle kokudliwa. 

UBrendan Rodgers wodumo kuLiverpool nguyena obeshayela umkhumbi weCeltic ngesikhathi igila lezi zimanga.

Ezakhe zaqoqa amaphuzu ayikhulu nesithupha kule sizini (106).

Juventus:

Lezi zinkunzi eziqhamuka kwelamaNtaliyane ziqophe umlando ngo-2011/12 zisobozela kwasani ku-Italian Serie A. U-Antonio Conte wayengumqeqeshi iJuve yenza ezibukwayo. Yabutha amaphuzu angamashumi ayisishiyagalombili nane ngaleyo sizini. Ngemuva kwalokho yalandelanisa ngezinye izicoco eziyisishiyagalolunye kulandelana.

Arsenal:

Namanje kusakhulunywa ngeqembu lika-Arsene Wenger elakhala lemuka nesicoco seligi lingazange lishaywe isizini yonke kwelamaNgisi.

See Also

Kuze kube yimanje alikho iqembu eselake lakwazi ukulandela ezinyathelweni zamaGunners ku-English Premier League.

EzikaWenger zaqopha lomlando ngo-2003/04 okusho ukuthi irekhodi lazo selihlale iminyaka engamashumi amabili nanye.

Ngale sizini yezimanga i-Arsenal yaqoqa amaphuzu angamashumi ayisishiyagalolunye.

AC Milan:

IRossoneri yamangaza umhlaba wonke ngo-1991/92 ngesikhathi idla ubhedu ku-Italian Serie A.

Yadla isicoco seligi ngesitayela iqeda iligi ingakaze idliwe ngisho owodwa umdlalo lo. UFabio Capello nguyena owayecija iMilan eyayibophele abadlali abafana noRuud Gullit, Marco Van Basten, Paolo Maldini, noFrank Rijkaard.

Scroll To Top