Wethulelwe isigqoko ukaputeni weBanyana Banyana ephula irekhodi lengwazi yomdlali waseGibhithe.
UKaputeni weBanyana uJanine Van Wyk ubedinga imidlalo emibili ukwephula irekhodi lengwazi yomdlali waseGibhithe, u-Ahmed Hasan eselihlale iminyaka.
UHasan wadlala imidlalo eli-185 emele izwe lakhe iGibhithe adla nayo inqwaba yezicoco ze-Africa Cup of Nations.
NgoLwesine, uVan Wyk ugcine emficile uHasan ngesikhathi iBanyana ibhekene neBurkina Faso emlenzeni wokuqala womdlalo wokuzibekisela indawo kuWomen’s Africa Cup of Nations (Wafcon) ezoba seMorocco ngonyaka ozayo.
IBanyana ibambane ngo 1-1 neBurkina Faso emlenzeni wokuqala kwathi kowesibili yanqoba ngo 2-0 ngoMsombuluko eLucas Moripe Stadium, ePitoli.
IBanyana igcine inqobe ngo 3-1 sekuhlanganiswe umphumela womdlalo nomlenze wokuqala nomlenze wesibili.
“Ngifisa ukuthatha leli thuba ngibongele uJanine ngokwephula leli rekhodi. Impela liphulwe ngumdlali okufanele ukwelephula,” kubeka u-Ellis.
UVan Wyk usethatha umhlalaphansi ebholeni likanobhutshuzwayo. Umele iBanyana kuyoyonke imiqhudelwano emikhulu nemqoka njengomdlali. Udlale kweyeNdebe yoMhlaba, Wafcon nakuma-Olympic Games.
“UVan Wyk uyalilwela izwe lakhe. Yingakho konke okwenzeka kuyena kumfanele. Ngimfisela inhlanhla ekhasini lakhe elisha njengoba esezokuba ngumqeqeshi. Akulula-ke kodwa kulo mkhakha. Nokho ngimfisela konke okuhle. Siyamamukela kwezokuqeqesha. Ngifisa sengathi impumelelo ayithole njengomdlali angakwazi ukuphinde ayithole njengomqeqeshi,” kulandisa u-Ellis.
UVan Wyk uneqembu lakhe elidlala kuHollywoodbets Super League elaziwa ngeJanine Van Wyk (JVW).
“Bekungeke kubelula ukwephula leli rekhodi ngaphandle komphumela omuhle. Ngiyazi ukuthi umcimbi ubungami kodwa okubaluleke kunakho konke bekuwunqoba umdlalo wanamuhla. Besazi ukuthi ukudlalela ekhaya kuzosibeka ethubeni elingcono lokuphumelela umdlalo. Ukuthola leli rekhodi yinto enkulu kimina. Ngijabule kakhulu ukuthi ngilithole ekhaya neqembu lesizwe lami engilithanda ukufa. Ngibenesikhathi esimnandi kuBanyana. Yebo, bezikhona izihibe endleleni yethu kodwa sangqashula,” kubeka uVan Wyk.