Usefisele umgadli weBafana Bafana ukululama ngokushesha ukaputeni weqembu lesizwe
ULyle Foster ogijima kuBurnely edlala ku-English Premier League (EPL) uphoqeleke ukuthi ahoxe esikwatini seBafana esizobhekana neBenin neRwanda kweyokuhlungela ukuzibekisela iNdebe yoMhlaba.
Lo mgadli ubhekene nesifo somzwangedwa esithinta ukuphazamiseka komqondo. Iqembu lakhe limnike ikhefu lesikhashana ukuze elaphe lesifo esimhlasele.
UWilliams ongukaputeni weqembu udlulise amazwi okuzwelana noFoster.
“Njengeqembu sifuna ukudlulisa lomyalezo kuLyle Foster. Asimlahlile. Sinaye ngokwemithandazo nangemicabango yethu. Sihlalele ethembeni lokuthi izinto zizolunga ohlangothini lwakhe,” kuchaza uWilliams.
IBafana izodudulana neBenin ngoMgqibelo ngo-3 ntambama eMoses Mabhida Stadium, eThekwini. Amathikithi alo mdlalo aseqalile ukudayisa. Abiza u-R50 kwabadala bese kuthi abancane abe ngu-R20. NgoLwesibili, iBafana izobe isivakashela iBenin ekuhambeni.
“Sifuna ukumbonga esenkundleni enza akuthandayo nakwazi kangcono okuwukudlala ibhola. Kumele azi ukuthi siyamthanda futhi siyameseka ngayo yonke indlela. Ngaphezu kwalokho siyamkhumbula,” kubeka uWilliams.
UFoster usephenduke isithenjwa eqenjini lesizwe. Kwelesizwe usebhakuzise enethini amagoli amane emidlalweni engu-13.
Naku-EPL uvutha engabaselwe. Useshaye amagoli amathathu waphinde wakha amabili emidlalweni eyisikhombisa.
Ifomi yakhe enhle kuBurnely iholele ekutheni agixabezwe ngenkontileka yeminyaka emihlanu.
UWilliams oqokwe njengonozinti ovelele ku-African Football League (AFL) uchaze ngesipiliyoni sokudlala kulo mqhudelwano onqontshwe yiqembu lakhe, iSundowns.
“Sifunde lukhulu ku-AFL. Kunzima ukudlala imidlalo ilandelana. Ngokomqondo kumele ube sesimeni esihle ikakhulukazi njengoba sihamba amabanga amade sidlala namaqembu ahlukene. Isipiliyoni esisithole eminyakeni eyedlule sibe wukhiye. Sizolekelela ozakwethu ngalesi sipiliyoni. Sibhekene nesimo asithi asicishe sifane nalesi ebesikade sibhekene naso eqenjini lethu. Kumqoka ukuthi siphumule ngokwami. Njengoba nomqeqeshi (uHugo Broos) eseshilo, ukuphumula kuzobamba elikhulu iqhaza empumelelweni yethu ngoba sesidlale imidlalo eminingi. Okunye okubalulekile wukuthi singayeki ukulambela impumelelo. Ekugcineni lona ngumsebenzi wethu. Akumele sibeke izaba. Noma ngubani uyakhathala kodwa siyakhokhelwa ngokwenza umsebenzi wethu.” kulandisa uWilliams.
