Ama-PROTEAS agaqele ukuzibekisela indawo kowamanqamu eNdebe yoMhlaba okokuqala emlandweni
Elakuleli labuyiselwa emidlalweni yamazwe ngo-1992 ngemuva kokudingiswa ngenxa yezimpi zobandlulo.
Kusukela labuyiselwa emidlalweni yamazwe alikaze liyiphakamise iNdebe yoMhlaba yekhilikithi. Ngaso sonke isikhathi lihlale libanjwa kweyandulela amanqamu.
NgoLwesine, amaProteas azodudulana ne-Australia kowandulela amanqamu ngo-10 ekuseni e-Eden Garden, eKolkata. Intatheli yalaboHlanga isibhekela indaba yokubanjwa kwamaProteas kweyandulela amanqamu.
Ibhadi lamaProteas kweyandulela amanqamu eNdebe yoMhlaba:
1992:
AmaProteas adlala okokuqala eNdebeni yoMhlaba ngemuva kokubuyiselwa emidlalweni yamazwe ngo-1992. Adlala ingcwenga yekhilikithi aze afinyelela kowandulela amanqamu kule Ndebe yoMhlaba eyayibanjelwa e-Australia naseNew Zealand. Aphazanyiswa yimvula ebhekene namaNgisi. AmaProteas ayejaha isibalo sama-run angu-252 esasibekwe amaNgisi kuma-over angu-45. Imvula yaqala ukuyidliva ngesikhathi esehlanganise ama-run angu-236 ebhodini kusawe amawikhethi ayisithupha. Yayidliva umdlalo kwaze kwaba uyamiswa. AmaNgisi agcine enqobe ngama-run angu-19.
1999:
Uma kukhulunjwa ngeqembu elalifanelwe yiNdebe yoMhlaba kule Ndebe yoMhlaba kukhulunjwa ngamaProteas. ULance Klusener wayenza ezibukwayo ngebhethi nangebhola. Yingakho wagcina eqokwe njengomdlali ovelele ngezimanga zakhe enkundleni. Okwababuhlungu wukuthi amProteas aphinde abhanjwa kowandulela amanqamu. Namanje isizwe sisazibuza ukuthi kwenzekalani phakathi kukaKlusener no-Alan Donald. AmaProteas ayedinga i-run eyodwa ukuze anqobe. I-Australia yayibeke isibalo sama-run angu-213. Elakuleli lakwazi ukusicifa lesi sibalo kodwa aseyedinga i-run eyodwa ukuze anqobe. Ngakolunye uhlangothi ama-Aussies ayedinga iwikhethi eyodwa ukuze adlulele kowamanqamu. UKlusener walishaya ibhola wase ethatha egijima kodwa uDonald wavele wazimela. Ama-Aussies athatha ibhola anqonda ezintini kwase kuphela kanjalo ngeNingizimu Afrika.
2007:
Ngo-2007, amaProteas aphinde afinyelela kowandulela amanqamu kulandela ukwenza kahle kweyamaqoqo. INdebe yoMhlaba yayibanjelwe eWest Indies ngalo nyaka. Ahlangana nezimbili zithutha ku-Australia eyayivele yawaphephula kalula amaProteas enqoba ngamawikhethi ayisikhombisa.
2009:
Inhlangano eyangamele ikhilikithi emhlabeni yasungula iNdebe yoMhlaba yeT20 ngo-2007. AmaProteas aphume ekuseni yize ayengosokhaya ngo-2007. Ngemuva kweminyaka emibili abuye ngamandla eNdebeni yoMhlaba ka-2009 eyayibanjelwe kwelasemaNgisi. Ahamba aze afinyelela kowandulela amanqamu kodwa afike akhishwa yiPakistan.
2014:
AmaProteas aphinde akhala ngaphansi kowandulela amanqamu eNdebe yoMhlaba ngo-2014 kwelaseBangladesh. Akhishwe ngelaseNdiya. Elakuleli labhethe kuqala lashaya ama-run angu-172. ElaseNdiya lasijaha lesi sibalo sama-run ngempumelelo kusasele i-over eyodwa kuphele umdlalo.
2015:
Lapha iNingizimu Afrika yayibophele ukhilimu wesikwati esasishaya ngabadlali abafana noHashim Amla, AB De Villiers, JP Duminy, Morne Morkel, Imran Tahir noDale Steyn. Imvula yavele yayidliva lapha amaProteas ayeshoshela khona neNew Zealand. Ngemuva kwemvula ahluleka wukuqhubeka ngomgqigqo ofanayo. Ama-Black Caps agcine enqobe ngamawikhethi ayisithupha laphela kanjalo iphupho lamaProteas lokuqeda ishobolo koweNdebe yoMhlaba.