Ubani ozokhonya eSoweto?

Umqeqeshi we-Orlando Pirates uJose Riveiro usezakhele ugazi kubalandeli beZimnyama ngokuletha izinsuku zenjabulo eParktown kodwa usahlalelwe yisikweletu emidlalweni yabakhaya baseSoweto.

Umdlalo wabakhaya baseSoweto yiwona mdlalo obiza kunayo yonke imidlalo kuDSTV Premiership.

NgoMgqibelo ngele-3.30 ntambama, Amakhosi azoshukana neBhakaniya eFNB Stadium emdlaweni wezinkani zababili.

Womabili amaqembu azobe ebanga amaphuzu amathathu. Phakathi nesonto azitholele amaphuzu amathathu.

IPirates iqumbe phansi iSekhukhune United ngelilodwa eqandeni kwathi iChiefs yaguqisa omakoti iCape Town Spurs ngamathathu kwamabili  eFNB.

Umqeqeshi wePirates uRiveiro usathungatha iwini yakhe yokuqala emidlalweni yabakhaya.

Ngesizini eyedlule uthelwe othulini yiChiefs kabili emidlalweni yeligi. Emzuliswaneni wokuqala uYusuf Maart udonse intambo engasenkabeni yenkundla, unozinti weZimnyama uSiyabonga Mpontshane uyijahe waze wayogaxela enethini kwazise ubephumile emapalini. Ibhola ligcine libhanjwa ezintanjeni. Amakhosi aphumelele kanjalo.

Emzuliswaneni wesibili u-Olisah Nda uhlabe umkhonto ngasekhaya laguqa kanjalo iBhakaniya. 

URiveiro uzithobe inhliziyo yokushaywa emidlalweni yabakhaya ngokunqoba izicoco ezimbili ngesizini eyedlule.

Ukhale wemuka nesicoco seMTN8 edla AmaZulu ngo 1-0 eMoses Mabhida Stadium, eThekwini ngegoli likaMonnapule Saleng.

Ekupheleni kwesizini ushaye iSekhukhune United eLoftus Stadium, ePitoli ukuze aphakamise isicoco seNedbank Cup.

Kule sizini ubuye wavikela eseMTN8. Nokho ngoMgqibelo uzobe ebheke ukukhokha isikweletu esikhulu sokunqoba umdlalo wabakhaya. 

Ubhekene noCavin Johnson osanda kuthatha izintambo kuChiefs. UJohnson uvale isikhala sikaMolefi Ntseki obesenyamanambana kubalandeli beqembu. Usehlale ebhentshini imidlalo emibili. Udliwe yiLamontville Golden Arrows wase ephumelela ngo 3-2 ebhekene neSpurs.

UJohnson naye uzobe ebhekene ukunqoba umdlalo wabakhaya okokuqala ngoMgqibelo. 

Kazi ngubani uzothola iwini yakhe yokuqala phakathi kukaJohnson noRiveiro? Kuyozwakala kodwa kukhona ozolahla phakathi kwabo bobabili.