Isundowns Ladies indizisele phezulu ifulegi lakuleli
UMandulo uqale ngegiya eliphezulu kwabesifazane kwezemidlalo njengoba iqembu lakuleli iMamelodi Sundowns Ladies liguqise iDouble Action Ladies yaseBotswana ngamabili eqandeni emdlalweni obuseSugar Ray Xulu Stadium, eClermont.
Lokhu kunqoba kweSundowns Ladies kuyinqophamlando njengoba izophinde imele isifunda iCosafa koweCaf Champions League e-Ivory Coast ngoLwezi nonyaka.
Leli qembu eliqeqeshwa uJerry Tshabalala kuzoba okwesithathu lingena koweCaf Champions League.
Ngonyaka wezi-2021 langena okokuqala kuwona lawunqoba ngesikhathi lihlula iqembu laseGhana iHasaacas Ladies ngamabili eqandeni. Nyakenye leli qembu liphinde langena kulo mqhudelwano nalapho lahlulwa khona kowamanqamu i-As Far yaseMorocco ngamagoli amane eqandeni. Unozinti weSundowns Ladies u-Andile Dlamini ophinde abe ngukaputeni uqokwe njengonozinti ovelele, emva kokungenelwa igoli elilodwa kuwona wonke umqhudelwano.
Kwenzeka lokhu walizwa ngendaba ijezi eqenjini lesizwe iBanyana Banyana kumqhudelwano weNdebe YoMhlaba, nokwaba udaba olwasusa okokhulu ukukhuluma.
Kwenye ingxenye yomhlaba Ngempelasonto edlule eNew York intokazi yaseMelika uCori Dionne “Coco” Gauff oneminyaka yobudala eli-19 uzifake emlandweni enqoba i-US Open. UCoco uhlule u-Aryna Sakalenka waseBelarus ngo (2-6, 6-3, 6-2), umlando azifake kuwona owokuba umdlali wesithathu omncane waseMelika ukunqoba i-US Open omunye uSerena Williams owayinqoba eneminyaka eli-17 ngonyaka we-1999. USerena kwabe kuyiGrand Slam yokuqala ukuyinqoba.
Kanti okunguye owayinqoba kuqala uTracy Austin ngowe-1979 nangowe-1981. UTracy okokuqala eyinqoba wabe eneminyaka eli-16.
Kumqhudelwano ofanayo ngayo impelasonto isithengwa sakuleli kowomphebezo abahamba ngewheelchair, uKgothatso Montjane, ube ngumpetha wayo i-US Open kwabadlaba ngababili.
UKgothatso waseSeshego eLimpopo ubebambisene nentokazi yaseJapan uYui Kamiji, lezintokazi zidle umhlanganiso zingawudlalanga owamanqamu ngenxa yokugula komunye wabadlali obekufanele babhekane nabo.
Bekumele babhekane noDiede de Groot noJiske Griffioen baseNetherlands kodwa (uJiske) wagula wangakwazi ukudlala.
Lesi yisicoco sesibili se-Grand Slam esithathwe nguMontjane noYui kulo nyaka kwazise baqale ngokudla iFrench Open ngoNhlangulana, lapho baguqisa uDiede noMaria Florencia Moreno kowamanqamu. Bafinyelele kowamanqamu eWimbledon ngoNtulikazi kodwa bakhala ngaphansi bebhekene noDe Groot benoJiske.
