IBrazil hleze nangengozi ibophe uPutin: Da Silva
UMengameli waseBrazil uLuiz Inacio Lula da Silva uthe ngoMgqibelo umholi waseRussia uVladimir Putin ngeke aboshwe eBrazil uma ehambele umhlangano weGroup of 20 eRio de Janeiro ngonyaka ozayo.
Exoxa eceleni komhlangano weG20 eDelhi ngohlelo lwezindaba iFirstpost, uLula uthe uPutin uzomenywa emcimbini wangonyaka ozayo, wengeza ngokuthi naye uhlela ukuhambela ingqungquthela yeBRICS yamazwe asathuthuka ezoba seRussia ngaphambi komhlangano waseRio.
“Ngikholwa wukuthi uPutin angaya kalula eBrazil,” kusho uLula. “Engingakusho kuwe ukuthi uma ngingumongameli waseBrazil, futhi eze eBrazil, ngeke aboshwe,” kuphetha uLula I-International Criminal Court yakhipha incwadi egunyaza ukuboshwa kukaPutin ngoNdasa, imsola ngecala lempi lokuxosha ngokungemthetho amakhulu ezingane e-Ukraine.
IRussia iphikile ukuthi amabutho ayo enze ubugebengu bempi, noma athathe izingane zase-Ukraine ngenkani.
UPutin sekunesikhathi agcina ukubonakala kwimibuthano yamazwe ngamazwe, futhi ubengekho emhlanganweni we-G20 eDelhi, njengoba ethumele uNgqongqoshe Wezangaphandle uSergei Lavrov. IBrazil isayine isiVumelwano saseRome esaholela ekusungulweni kwe-ICC. Ihhovisi likaLula alizange liphendule ngokushesha esicelweni sokuphawula.
NgoMgqibelo, amazwe eG20 amukele isimemezelo sokuvumelana esigwema ukugxeka iRussia ngempi yase-Ukraine kodwa sacela ukuthi wonke amazwe angamalunga alenhlangano ukuthi angasebenzisi amandla ukuze athole izindawo.