Kuphinde kwahlaluka utwayi oludala kwaTransnet
Inkampani engaphansi kukahulumeni yamachweba, izitimela kanye nezokuthutha, iTransnet ibike ukuthi ilahlekelwe isigidi sezigidi ezi-R5.7 njengoba umthamo wezitimela uqhubeka nokwehla.
Ethula imiphumela yezimali yalenkampani yonyaka ophele ngoNdasa wezi-2023, isikhulu esiphezulu uPortia Derby uthe ukungatholakali kwezitimela, ukwebiwa kwamakhebula kanye nokuxebuka kusaqhubeka nokubeka izinselelo zokusebenza kule nkampani.
UDerby uthe zingaphezu kwama-300 izitimela ezingasebenzi njengamanje ngenxa yokungaboni ngaso linye nomkhiqizi iChina Railway Rolling Stock Corporation.
Ngokusho kwaDerby lokhu kuholele ekwehleni komthamo wezitimela ngama-13%. Uthe kunesivumelwano osekufinyelelwe kuso sokuthi kubuyiselwe izitimela ezingama-70 ekupheleni kwalo nyaka wezimali. Khonamanjalo, uNgqongqoshe wamaBhizinisi kaHulumeni, uPravin Gordhan, uthe manje sekusezandleni zeNingizimu Afrika ukuqinisekisa ukuthi ukungaboni ngaso linye phakathi kweTransnet neChina Railway Rolling Stock Corporation kuyaxazululeka.
Inkampani yaseChina Railway ihoxise ukusebenza kwayo ngemuva kokuthinteka embikweni wokugwamandwa kwamandla ombuso mayelana nenkontileka yayo yezigidigidi zamarandi yokuhlinzeka uTransnet ngezitimela ezintsha.
Lokhu sekuholele ekutheni u-Transnet ungakwazi ukuthola izipele zezitimela zayo ezingaphezu kwama-300. UGordhan uthe ukuvakasha eChina kanye nokuvakasha kukaMengameli waseChina kwakamuva kusizile ukuxazulula ukushuba kwesimo. “Sibe nengxoxo eyakhayo nobuholi be-CRRC. Kusohlangothini lwaseNingizimu Afrika lapho sidinga ukusisheshisa khona izinhlelo ezithile ezizosisiza ukuthi, A sithole izingxenye eziyisipele, B sithole ochwepheshe kanti amanye ama-visa asehleliwe kanti C kunezitimela ezingaba ngama-99 ezisele futhi kwaba nohlelo lokudiliva. . Ezinye zizophela unyaka, ezinye ngasekupheleni konyaka ozayo okuzophinde kunikeze impumuzo.”
